கன்னியாகுமரி மாவட்டத்தில் உள்ள இடையன்விளை பகுதியில் மகேஸ்வரன் என்பவர் வசித்து வருகிறார். இந்நிலையில் வயிற்று வலி காரணமாக நாகர்கோவிலில் இருக்கும் தனியார் மருத்துவமனையில் அனுமதிக்கப்பட்ட மகேஸ்வரனுக்கு அறுவை சிகிச்சை செய்யப்பட்டது. அதன் பிறகும் அவரது வயிறு வலி குறையவில்லை. இதனால் வேறொரு மருத்துவமனையில் மகேஸ்வரன் சிகிச்சைக்காக அனுமதிக்கப்பட்டார். இந்நிலையில் முறையான ரசீது மற்றும் மருத்துவ சிகிச்சை சம்பந்தமான ஆவணங்களை தருமாறு முதலில் அறுவை சிகிச்சை செய்த தனியார் மருத்துவமனையில் மகேஸ்வரன் கேட்டுள்ளார்.
ஆனால் மருத்துவமனை நிர்வாகம் அதனை கொடுக்க மறுத்ததால் மகேஸ்வரன் வழக்கறிஞர் மூலம் நோட்டீஸ் அனுப்பியுள்ளார். அதற்கும் உரிய பதில் கிடைக்கவில்லை. பின்னர் மகேஸ்வரன் குமரி மாவட்ட நுகர்வோர் குறைதீர் ஆணையத்தில் வழக்கு தொடர்ந்தார். இந்த வழக்கினை விசாரித்த குறைதீர் ஆணைய தலைவர் சுரேஷ், உறுப்பினர் சங்கர் ஆகியோர் மருத்துவமனையின் சேவை குறைபாட்டை சுட்டிக்காட்டி 75 ஆயிரம் ரூபாய் நஷ்ட ஈடு, வழக்கு செலவு 10 ஆயிரம் ரூபாய் ஆகியவற்றை ஒரு மாத காலத்திற்குள் மகேஸ்வரனுக்கு வழங்க வேண்டும் என அதிரடியாக உத்தரவு பிறப்பித்தனர்.