தமிழகத்தில் கடந்த சில நாட்களுக்கு முன்பு கொரோனா தொற்று பரவல் அதிவேகமாக பரவி வந்தது. இதனால் தமிழக அரசு பல்வேறு முன்னெச்சரிக்கை நடவடிக்கைகளை மேற்கொண்டது. அதன்படி இரவு நேர ஊரடங்கு, வார கடைசி நாளான ஞாயிற்றுக்கிழமைகளில் முழு ஊரடங்கு போன்றவை அமல்படுத்தப்பட்டது.
அந்த வகையில் கடந்த 3 வாரம் ஞாயிற்றுக்கிழமை முழு ஊரடங்கு கடைபிடிக்கப்பட்டது. மேலும் பொதுமக்களுக்கு பல்வேறு ஊரடங்கு கட்டுப்பாடுகள் விதிக்கப்பட்டது. அதனைத் தொடர்ந்து கொரோனா தொற்று பாதிப்பு சற்று குறைந்து வந்த நிலையில் முதல்வர் முக. ஸ்டாலின் தலைமையில் ஆலோசனை நடைபெற்றது.
அந்த ஆலோசனைக் கூட்டத்தின் முடிவில் இரவு நேர ஊரடங்கு, ஞாயிற்றுக்கிழமை முழு ஊரடங்கு போன்றவை ரத்து செய்யப்பட்டது. ஆகவே இன்று (ஜனவரி 30) முழு ஊரடங்கு கிடையாது என்று தமிழக அரசு அறிவித்துள்ளது. இதனால் அரசு அறிவித்துள்ள கட்டுப்பாடுகளின்படி வழக்கம்போல் கடைகள் செயல்படும் என்று தெரிவிக்கப்பட்டுள்ளது.