உக்ரைனில் சிக்கியுள்ள மாணவர்கள் தமிழகம் திரும்புவது குறித்து அமைச்சர் மா.சுப்பிரமணியன் கருத்து தெரிவித்துள்ளார்.
உக்ரைன் மீது ரஷ்யா 5-வது நாளாக தாக்குதல் நடத்தி வருகிறது. இந்த தாக்குதலில் உக்ரைன் மிகவும் பலவீனம் அடைந்துள்ளது. இதனால் உக்ரைன் உதவி கேட்டும் உலக நாடுகள் ரஷ்யாவுடன் போரிட முன்வரவில்லை என உக்ரைன் அதிபர் ஜெலன்ஸ்கி வேதனையுடன் தெரிவித்துள்ளார். தற்போது உக்ரைனுக்கு கல்வி மற்றும் வேலைக்காக சென்ற தமிழகத்தை சேர்ந்தவர்கள் உக்ரைனில் சிக்கியுள்ளனர். இதனால் அவர்களை மீட்க அரசு நடவடிக்கை எடுத்து வருகிறது.
இந்நிலையில் உக்ரைனில் சிக்கியுள்ளவர்களை தமிழகம் திரும்புவதற்கான செலவை அரசே ஏற்கும் என முதலமைச்சர் மு.க.ஸ்டாலின் கூறியிருந்தார். தற்போது அமைச்சர் மா.சுப்பிரமணியன் இதுகுறித்து கூறுகையில் “உக்ரைனில் உள்ள மாணவர்களை மீட்க அரசு தொடர்ந்து முயற்சி எடுத்து வருகிறது. மேலும் தமிழக மருத்துவ கல்லூரிகளில் சீட் கிடைக்காத காரணத்தினால் தான் வெளிநாடுகளில் கல்வி பயில மாணவர்கள் செல்கின்றனர். இதனை தொடர்ந்து குறைந்த கட்டணம் வசூலிக்க கூடிய நாடுகளுக்கு கல்வி பயில மாணவர்கள் செல்வது வழக்கமான ஒன்றுதான்” என கூறியுள்ளார்.