தமிழகத்தில் கொரோனா பரவலை தடுப்பதற்காக நாளை முதல் தளர்வுகளற்ற ஊரடங்கு அமல்படுத்த தமிழக அரசு முடிவு செய்துள்ளது. இந்த முழு ஊரடங்கை வரவேற்று பாமக நிறுவனர் டாக்டர் ராமதாஸ் பாராட்டியுள்ளார். இது குறித்து அவர் வெளியிட்டுள்ள டுவிட்டர் பக்கத்தில், “தமிழகத்தில் கொரோனா பரவலை கட்டுப்படுத்த 24-ஆம் தேதி முதல் ஒரு வாரத்திற்கு தளர்வுகளே இல்லாத கடுமையான ஊரடங்கு நடைமுறைப்படுத்தப்படும் என்று தமிழக அரசு அறிவித்திருப்பது வரவேற்கத்தக்கது.
இது நல்ல முடிவுதான். ஆனால் தளர்வுகளில்லாத ஊரடங்கு என்பது சாலைகளில் எந்த நடமாட்டமும் இல்லாமல் இருக்க வேண்டும். அப்படி இருந்தால் மட்டுமே கொரோனாவை கட்டுப்படுத்த முடியும். இன்று கடைகள் திறக்கப்படுவதால் மக்கள் கூட்டம் கூடுவதை தவிர்க்க வேண்டும். தேவைப்பட்டால் மட்டுமே வெளியில் வந்து பாதுகாப்பு விதிமுறைகளுடன் பொருட்களை வாங்கிச் செல்ல வேண்டும்” என்று தெரிவித்துள்ளார்.