மாஸ்டர் திரைப்படத்தின் வெற்றிக்கு பிறகு நடிகர் விஜய் நடித்த திரைப்படம் பீஸ்ட். இந்த படத்தை நெல்சன் திலீப் குமார் இயக்கியுள்ளார். இப்படத்தில் விஜய்க்கு ஜோடியாக பூஜா ஹெக்டே மற்றும் வில்லனாக ஷான் டாம் சாக்கோவும் நடித்துள்ளார். மேலும் செல்வராகவன், விடிவி கணேஷ், அபர்ணா தாஸ், யோகிபாபு உள்ளிட்ட முக்கிய பிரபலங்கள் இந்த படத்தில் நடித்துள்ளனர்.
தமிழில் தயாராகியுள்ள பீஸ்ட் திரைப்படம் தெலுங்கு, மலையாளம், இந்தி, கன்னடம் உள்ளிட்ட மொழிகளில் டப்பிங் செய்யப்பட்டு வெளியிடப்பட்டுள்ளது. இந்த படம் வருகிற ஏப்ரல் 13-ஆம் தேதி திரையரங்களில் வெளியாக உள்ளது. பீஸ்ட் படத்தின் ரிலீஸ் நெருங்கி வருவதால் அந்த படத்தின் புரமோஷன் வேலைகளில் படக்குழுவினர் தீவிரமாக ஈடுபட்டு வருகின்றனர்.
இந்த படத்தை குவைத் நாட்டில் வெளியிடுவதற்கு தடை விதிக்கப்பட்ட நிலையில் தற்போது தமிழகத்திலும் பீஸ்ட் படத்தை வெளியிடக் கூடாது என்று இஸ்லாமிய அமைப்புகள் கோரிக்கை விடுத்துள்ளன. பீஸ்ட் படத்தில் இஸ்லாமியர்களை தீவிரவாதிகளாக காட்டுவதாக தகவல் வந்துள்ளதால் அப்படத்தை தடை செய்ய வேண்டும் என்று கோரிக்கை விடுக்கப்பட்டுள்ளது. இல்லையெனில் மிகப் பெரிய போராட்டம் வெடிக்கும் எனவும் எச்சரிக்கப்பட்டுள்ளது. இதனால் பீஸ்ட் படத்தில் சில காட்சிகள் நீக்கப்படுவதற்கு வாய்ப்புகள் உள்ளதாக கூறப்படுகின்றது.