தமிழகத்தில் புதிதாக அரசு மருத்துவக் கல்லூரிகளில் 1450 மாணவர்களை சேர்க்க மத்திய அரசு ஒப்புதல் வழங்கி உள்ளதாக சுகாதாரத் துறை அமைச்சர் மா. சுப்ரமணியன் தெரிவித்துள்ளார். சென்னையில் பேட்டியளித்த அவர், தமிழகத்தில் கட்டப்பட்டு வருகின்ற விருதுநகர், கள்ளக்குறிச்சி மற்றும் நீலகிரி மாவட்ட அரசு மருத்துவக் கல்லூரிகளில் தலா 150 மாணவர்கள், ராமநாதபுரம், திருப்பூர், நாமக்கல் மற்றும் திருவள்ளூர் அரசு மருத்துவக் கல்லூரிகளில் தலா 100 மாணவர்கள் என 850 மாணவர்களை சேர்ப்பதற்கு மத்திய அரசு அனுமதி வழங்கியிருந்தது. \
இந்நிலையில் கிருஷ்ணகிரி, திண்டுக்கல், நாகப்பட்டினம் மற்றும் அரியலூர் மாவட்ட அரசு மருத்துவக் கல்லூரிகளில் தலா 150 மாணவர்கள் என 600 மாணவர்களை சேர்க்க புதிதாக மத்திய அரசு ஒப்புதல் வழங்கியுள்ளது. இதையடுத்து 1450 மாணவர்களை இந்த ஆண்டு சேர்க்க வாய்ப்பு ஏற்பட்டுள்ளது. புதிய இடங்களை சேர்த்தும், தமிழகத்தில் 9100மாணவ மாணவியர் மருத்துவம் படிக்க முடியும் என்று அமைச்சர் கூறியுள்ளார்.இது மாணவர்கள் மற்றும் பெற்றோர்கள் மத்தியில் மகிழ்ச்சி தரும் செய்தியாக அமைந்துள்ளது.