தமிழகத்தில் ஏப்ரல் 6-ஆம் தேதி சட்டமன்ற தேர்தல் நடைபெற உள்ளது. அதனால் அனைத்து கட்சிகளும் தீவிர தேர்தல் பிரசாரத்தில் ஈடுபட்டு வருவதால் தேர்தல் களம் சூடு பிடிக்க தொடங்கியுள்ளது. ஒவ்வொரு கட்சியினரும் தங்கள் எதிர்கட்சியினரை கடுமையாக விமர்சித்து தேர்தல் பிரசாரம் செய்து வருகிறார்கள். அதிலும் குறிப்பாக அதிமுக மற்றும் திமுக இடையே கடும் மோதல் போக்கு நிலவி வருகிறது. இதற்கு மத்தியில் சட்டமன்ற தேர்தலில் போட்டியிடும் வேட்பாளர்கள் பட்டியலை ஒவ்வொரு கட்சியும் வெளியிட்டு வருகிறது.
மறுபக்கம் மக்களைக் கவர அனைத்து கட்சியினரும் மக்களிடம் நேரடி தேர்தல் பிரசாரத்தில் களமிறங்கியுள்ளனர். இந்நிலையில் ஏற்கனவே கோவில்பட்டி தொகுதியில் எம்எல்ஏ வாக இருக்கும் கடம்பூர் ராஜு மீண்டும் அதே தொகுதியில் களமிறங்குகிறார். அவருக்கு போட்டியாக அமமுக சார்பாக டிடிவி தினகரன் களமிறங்குகிறார். இதனால் போட்டி கடுமையாக இருக்கும் என்பதால் கடம்பூர் ராஜு பல்வேறு தேர்தல் வாக்குறுதிகளை கொடுத்து வருகிறார். இந்நிலையில் பிரச்சாரத்தில் ஈடுபடும் கடம்பூர் ராஜு, அதிமுக வெற்றி பெற்றால் கோவில்பட்டியை தலைமையிடமாக கொண்டு புதிய மாவட்டம் உருவாக்கப்படும் என்று வாக்குறுதி அளித்துள்ளார்.