நகைக் கடன்கள் தள்ளுபட தொடர்பாக மேலும் ஒரு அறிவிப்பு வெளியாகியுள்ளது.
தமிழகத்தில் நடைபெற்ற கடந்த சட்ட மன்ற தேர்தலின்போது திமுக தனது தேர்தல் அறிக்கையில் முக்கிய வாக்குறுதியாக, கூட்டுறவு நகை கடன்கள் தள்ளுபடி செய்யப்படும் என்று வாக்காளர்களுக்கு அளித்து இருந்தது. அதாவது, கூட்டுறவு வங்கிகளில் 5 சவரன் மற்றும் அதற்கு குறைவாக தங்க நகைகளை அடமானம் வைத்துள்ள பயனாளிகளின் கடன்களை தள்ளுபடி செய்யப்படுவதாக முதல்வர் மு.க.ஸ்டாலின் வாக்குறுதி அளித்து இருந்தார்.
இந்நிலையில் திமுக ஆட்சியை பிடித்த பிறகு, கூட்டுறவு வங்கிகளில் 5 சவரன் வரையிலும் பெறப்பட்ட நகைக்கடன் தள்ளுபடி தொடர்பாக அதிரடி நிபந்தனைகள் விதிக்கப்பட்டது. இதன் மூலம் 5 சவரன் நகைக்கு மேல் ஒரு கிராம் அதிகமாக நகை அடமானம் வைத்திருப்பவர்கள் உள்ளிட்டோருக்கு நகை கடன்கள் தள்ளுபடி கிடையாது என்று திமுக அரசு தற்போது அதிரடியாக அறிவித்துள்ளது.
இவ்வாறு தேர்தலின்போது அளித்த வாக்குறுதியின்படி, 5 சவரன் நகை கடன் பெற்று உள்ள அனைவருக்கும் தள்ளுபடியை அரசு அறிவிக்க வேண்டும் என பயனாளிகள் கோரிக்கை விடுத்துள்ள நிலையில், விருதுநகர் மாவட்டம் நகைக்கடன் தள்ளுபடி தொடர்பாக கூட்டுறவு சங்கங்களின் இணைப்பதிவாளர் வெளியிட்டுள்ள அறிவிப்பில் கூறப்பட்டுள்ளதாவது, விருதுநகர் மாவட்டத்தில் கூட்டுறவு துறை கட்டுப்பாட்டில் செயல்படும் நகைக்கடன் வழங்கும் கூட்டுறவு நிறுவனங்களில் தமிழக அரசின் ஆணை படி, பொது நகை கடன் தள்ளுபடி திட்டம் 2021 ன் கீழ் நகைக் கடன்கள் தள்ளுபடிக்கு தகுதியான பயனாளிகள் பட்டியல் https://virudhunagar.nic.in என்ற வலை தளத்திலும் மற்றும் கடந்த 8.4.2022 அன்று விருதுநகர் மாவட்ட மத்திய கூட்டுறவு வங்கி வலைதளமான www.vrdccbank.in லும் வெளியிடப்பட்டுள்ளது.
இதையடுத்து இந்த அரசாணையின்படி, தள்ளுபடிக்கு தகுதியான பட்டியலை வலைதளத்தில் வெளியிடப்பட்ட 8.4.2022 முதல் 7.5.2022 வரை ஒருமாத காலத்தில், தள்ளுபடிக்கு தகுதி பெறாதோர் தங்களது ஆட்சேபனை மனுக்கள் மற்றும் மேல்முறையீட்டு மனுக்கள் தொடர்புடைய கூட்டுறவுச் சங்கங்களுக்கு உட்பட்ட அருப்புக்கோட்டை மற்றும் ஸ்ரீவில்லிபுத்தூர் சரக துணைப்பதிவாளர் அலுவலகங்களில் மனுக்களை அளிக்கலாம். இவ்வாறு அதில் கூறப்பட்டுள்ளது.