தமிழகத்திலுள்ள அரசு தொடக்கப் பள்ளிகளில் 1-5-ஆம் வகுப்பு வரை படிக்கும் மாணவ, மாணவிகளுக்கு அனைத்துப் பள்ளி நாட்களிலும் காலை உணவு வழங்க அரசு திட்டமிட்டு இருக்கிறது. அதன்படி முதல் கட்டமாக தமிழகத்தில் மாநகராட்சி, நகராட்சி மற்றும் கிராமப்புறங்களிலிள்ள ஆயிரத்து 545 பள்ளிகளில் இந்த திட்டம் செயல்படுத்தப்படவுள்ளது.
இதற்கென தமிழ்நாடு அரசு ரூபாய்.33.56 கோடி ஒதுக்கீடு செய்து உத்தரவு பிறப்பித்துள்ளது. இந்த திட்டத்தின் வாயிலாக 1.14 லட்சம் மாணவ, மாணவியர்கள் பயனடைவர். படிப்படியாக இத்திட்டம் தமிழகம் முழுதும் விரிவுபடுத்தப்பட இருக்கிறது. இந்த திட்டத்தை பேரறிஞர் அண்ணாவின் பிறந்தநாளான வருகிற 15ஆம் தேதியன்று முதல்வர் மு.க.ஸ்டாலின் மதுரையில் தொடங்கி வைக்கிறார்.
மதுரை மாநகராட்சியிலுள்ள 26 தொடக்கப்பள்ளிகளில் மொத்தம் 4,388 மாணவர்கள் பயன்பெறும் விதமாக இத்திட்டம் தொடங்கப்படவுள்ளது. மொத்தம் 14 மாநகராட்சிகளில் 37,740 மாணவ- மாணவியருக்கும், 23 நகராட்சிகளில் 17, 427 மாணவ மாணவியருக்கும் காலை சிற்றுண்டி வழங்கப்பட இருக்கிறது.