தமிழகத்தில் 10ஆம் வகுப்பு பொதுத்தேர்வு ரத்து செய்வது பற்றி பள்ளி கல்வித்துறை அதிகாரிகள் மற்றும் அரசு ஆலோசித்து வருகிறது.
தமிழகத்தில் கொரோனா அச்சுறுத்தல் காரணமாக கடந்த மார்ச் மாதம் பள்ளி மற்றும் கல்லூரிகள் அனைத்தும் மூடப்பட்டன. அதனால் மாணவர்கள் அனைவருக்கும் ஆன்லைன் மூலமாக வகுப்புகள் நடத்தப்பட்டு வந்தன. இதனையடுத்து 10 மற்றும் 12ஆம் வகுப்பு மாணவர்களுக்கு பொதுத்தேர்வு நெருங்கிக் கொண்டிருப்பதால், பெற்றோர்களிடம் கருத்து கேட்கப்பட்டு பள்ளிகள் திறக்கப்பட்டன.
தற்போது தமிழகம் முழுவதிலும் 9 முதல் 12 ஆம் வகுப்பு மாணவர்கள் அனைவருக்கும் பள்ளிகள் திறக்கப்பட்டு வகுப்புகள் நடந்து கொண்டிருக்கின்றன. இந்நிலையில் பிளஸ் 2 மாணவர்களுக்கு பொதுத் தேர்வு மே 3ஆம் தேதி தொடங்கி 21ஆம் தேதி முடிவடையும் என பள்ளி கல்வித்துறை அறிவித்தது.
இந்நிலையில் தமிழகத்தில் ஏப்ரல் மாத இறுதியில் சட்டப்பேரவை தேர்தல் நடத்த ஏற்பாடுகள் நடந்து வருகின்றன. அதனால் பத்தாம் வகுப்பு பொதுத் தேர்வு மே மாதம் நடக்க முடியாமல் போகலாம் என தகவல் வெளியாகியுள்ளது. மே மாதம் 12 ஆம் வகுப்பு பொதுத் தேர்வு நடக்க உள்ளது. அதன்பிறகு பத்தாம் வகுப்பு பொது தேர்வு நடத்தினால் அடுத்த கல்வி ஆண்டு தள்ளிப்போகும் என்பதால் தேர்வை ரத்து செய்து விடலாமா என்று பள்ளிக் கல்வித்துறை அதிகாரிகள் மற்றும் அரசு ஆலோசித்து வருவதாக கூறப்படுகிறது.