இந்து சமய அறநிலையத்துறை சார்பாக தமிழகத்திலுள்ள அனைத்து முக்கியமான கோவில்களிலும் இலவச பிரசாதம் வழங்க வேண்டும் என்று அரசு உத்தரவு பிறப்பித்துள்ளது. இதனையடுத்து முதற்கட்டமாகத் தமிழகத்திலுள்ள 10 கோயில்களில் இலவச பிரசாதம் வழங்கும் திட்டம் நேற்று முதல் தொடங்கியுள்ளது. இத்திட்டத்தை இந்துசமய அறநிலையத்துறை அமைச்சர் சேகர்பாபு சென்னை வடபழனி முருகன் கோயிலில் தொடங்கி வைத்தார்.
அந்த வகையில் வடபழனி முருகன் கோவில், திருச்செந்தூர் முருகன் கோவில், பழனி முருகன் கோவில், திருவேற்காடு கருமாரியம்மன் கோவில், சமயபுரம் மாரியம்மன் கோவில், மருதமலை முருகன் கோவில், திருத்தணி முருகன் கோவில், பண்ணாரி மாரியம்மன் கோவில், திருவரங்கம் அரங்கநாதர் கோவில், மதுரை மீனாட்சி சுந்தரேஸ்வரர் கோவில் உள்ளிட்ட 10 கோயில்களில் இந்த திட்டம் நேற்று முதல் தொடங்கியது. இந்த 10 கோயில்களில் இலவச பிரசாதமாக தலா 40 கிராம் எடையில் பொங்கல், தயிர் சாதம், லட்டு, புளியோதரை, சுண்டல் உள்ளிட்ட 4 முதல் 6 வகையான உணவுகள் இலவசமாக வழங்கப்படும். மேலும் அடுத்தடுத்து மற்ற கோயில்களிலும் இத்திட்டம் நடைமுறைப்படுத்தப்பட இருக்கிறது.