தமிழகத்தில் 1 முதல் 12-ஆம் வகுப்பு மாணவர்களுக்கு பொதுத்தேர்வுகள் முடிவடைந்து கோடை விடுமுறை அளிக்கப்பட்டது. 1 முதல் 10 ஆம் வகுப்பு மாணவர்களுக்கு கோடை விடுமுறை முடிவடைந்து ஜூன் 13ஆம் தேதி பள்ளிகள் திறக்கப்படும் என்று அறிவிக்கப்பட்டிருந்தது. மாணவர்களுக்கு கோடை விடுமுறை விடப்பட்டதும், குடும்பத்துடன் பலரும் சுற்றுலா தலங்களுக்கு படையெடுத்து சென்று விட்டனர். சென்னையில் இருந்து ஏராளமானோர் சொந்த ஊர்களுக்கு சென்று விட்டனர். அதனைப் போல பிற ஊர்களில் இருந்து ஏராளமான மக்கள் வேறு சில ஊர்களுக்கு கோடை விடுமுறையை கழிக்க சென்றுவிட்டனர்.இந்நிலையில் கோடை விடுமுறை முடிவடைந்து பள்ளிகள் நாளை திறக்கப்பட உள்ளது. எனவே சொந்த ஊர்களுக்கு மக்கள் மீண்டும் செல்கின்றனர்.
அவர்களின் வசதிக்காக தமிழகம் முழுவதும் அரசு விரைவு போக்குவரத்துக் கழகங்களின் சார்பில் சுமார் 850 பேருந்துகளை கூடுதலாக இயக்க நடவடிக்கை எடுக்கப்பட்டுள்ளது. அதன்படி மதுரை, கோவை, திருச்சி திருநெல்வேலி, சேலம், நாகர்கோவில் போன்ற இடங்களில் இருந்து சென்னைக்கு வழக்கமாக இயக்கப்படும் பேருந்துகளுடன் கூடுதலாக 250 பேருந்துகள் இயக்கப்பட உள்ளது. மேலும் பயணிகளின் எண்ணிக்கை அதிகரிக்கும் பட்சத்தில் அதற்கு ஏற்ற வகையில் கூடுதல் பேருந்துகளை இயக்குவதற்கு தயார் நிலையில் இருக்க வேண்டும் என்று அனைத்து போக்குவரத்து கழகங்களுக்கும் அறிவுறுத்தப்பட்டுள்ளது.