ஏடிஸ் கொசுக்களால் பரவும் டெங்கு காய்ச்சல் வருடம் முழுவதும் கண்டறியப்படும் நோய் என்றாலும் மழைக்காலங்களில் கூடுதல் பாதிப்பை ஏற்படுத்துகிறது. எனவே மழைக்காலத்தில் வீடுகளை சுற்றி மழை நீர் தேங்காமல் பார்த்துக் கொள்ள வேண்டும் என்றும், டயர்கள் உள்ளிட்ட எந்த பொருள்களிலும் நன்னீர் தேங்காமல் கவனமுடன் இருக்கும்படியும் சுகாதாரத்துறை அறிவுறுத்தி வருகிறது.
இந்நிலையில் தமிழகத்தில் கடந்த ஒரு வாரத்தில் மட்டும் 164 பேருக்கு டெங்கு காய்ச்சல் உறுதி செய்யப்பட்டுள்ளதாக சுகாதாரத்துறை தெரிவித்துள்ளது. குறிப்பாக சென்னை உட்பட வட மாவட்டங்களில் பாதிப்பு அதிகம் இருப்பதாகவும், தமிழகத்தில் தொடர்ந்து மழை பெய்து வரும் நிலையில், வரும் நாட்களில் டெங்கு பாதிப்பு உயர வாய்ப்புள்ளதாகவும் எச்சரிக்கப்பட்டுள்ளது. மேலும் டெங்கு காய்ச்சலை கட்டுப்படுத்த 785 மருத்துவ குழுக்கள் காய்ச்சல் தடுப்பு பணிகளில் ஈடுபட்டு வருவதாக தெரிவித்துள்ளது.