தமிழகம் முழுவதும் கடந்த ஏப்ரல் 15ஆம் தேதி மீன்பிடி தடைக்காலம் தொடங்கியது. மீன் இனப்பெருக்க காலத்தை கருத்தில் கொண்டு கடந்த ஏப்ரல் 15ஆம் தேதி முதல் ஜூன் 14 ஆம் தேதி வரை 61 நாட்கள் மீன்பிடி தடைக்காலம் போடப்பட்டது. இந்த நாளில் மீனவர்கள் கடலுக்கு சென்று மீன் பிடிக்க கூடாது. அதனால் கன்னியாகுமரி, நெல்லை, புதுக்கோட்டை, நாகை மற்றும் சென்னை உள்ளிட்ட 14 மாவட்டங்களைச் சேர்ந்த 15 ஆயிரம் விசைப்படகுகள் நிறுத்தி வைக்கப்பட்டுள்ளன.
இதனால் கடந்த சில நாட்களாக மீன்களின் விலை பல மடங்கு உயர்ந்து வந்தது. இந்நிலையில் தமிழகத்தில் மீன்பிடி தடைக்காலம் இன்றுடன் நிறைவடைகிறது. இதையடுத்து நாளை முதல் மீண்டும் விசைப்படகு மீனவர்கள் கடலுக்கு மீன்பிடிக்க செல்ல உள்ளனர். இதற்காக அனைத்து ஏற்பாடுகளையும் அவர்கள் தீவிரப்படுத்தியுள்ளனர். படகுகளுக்கு பழுது பார்த்தும், வண்ணம் தீட்டியும் தயார் படுத்தி உள்ளனர். அத்துடன் வலை மற்றும் தேவையான உபகரணங்களையும் தயார் செய்துள்ளனர். இதனால் தமிழகத்தில் விரைவில் மீன் விலை குறையும் என எதிர்பார்க்கப்படுகிறது.