தமிழகத்தில் மே 3ஆம் தேதி திட்டமிட்டபடி 12 ஆம் வகுப்பு மாணவர்களுக்கு பொது தேர்வு நடைபெறும் என பள்ளி கல்வித்துறை அறிவித்துள்ளது.
தமிழகத்தில் கொரோனா அச்சுறுத்தல் காரணமாக கடந்த மார்ச் மாதம் பள்ளி மற்றும் கல்லூரிகள் அனைத்தும் மூடப்பட்டன. அதனால் மாணவர்கள் அனைவருக்கும் ஆன்லைன் மூலமாக வகுப்புகள் நடத்தப்பட்டு வந்தன. இதனையடுத்து 10 மற்றும் 12ஆம் வகுப்பு மாணவர்களுக்கு பொதுத்தேர்வு நெருங்கிக் கொண்டிருப்பதால், பெற்றோர்களிடம் கருத்து கேட்கப்பட்டு பள்ளிகள் திறக்கப்பட்டன. தற்போது தமிழகம் முழுவதிலும் 9 முதல் 12 ஆம் வகுப்பு மாணவர்கள் அனைவருக்கும் பள்ளிகள் திறக்கப்பட்டு வகுப்புகள் நடந்து கொண்டிருக்கின்றன.
இந்நிலையில் பிளஸ் 2 மாணவர்களுக்கு பொதுத் தேர்வு மே 3ஆம் தேதி தொடங்கி 21ஆம் தேதி முடிவடையும் என பள்ளி கல்வித்துறை அறிவித்தது. இதனையடுத்து 9 முதல் 11 ஆம் வகுப்பு மாணவர்களுக்கு தேர்வின்றி ஆல்பாஸ் செய்யப்படுவதாக தமிழக அரசு அறிவித்துள்ளது. மேலும் தேர்தல் தேதி அறிவிக்கப்பட்டுள்ள நிலையில் 12ஆம் வகுப்பு தேர்வு நடைபெறுமா என அனைவரும் குழப்பத்தில் உள்ளனர்.
இந்நிலையில் தமிழகத்தில் மே 3ஆம் தேதி திட்டமிட்டபடி 12 ஆம் வகுப்பு பொதுத் தேர்வு நடைபெறும் என பள்ளி கல்வித்துறை அறிவித்துள்ளது. தமிழக சட்டசபைத் தேர்தல் வாக்கு எண்ணிக்கை மே 2ஆம் தேதி நடைபெறுவதால் 12 ஆம் வகுப்பு தேர்வுகள் தள்ளி வைக்கப்படுவதாக சமூக வலைத்தளங்களில் செய்திகள் பரவின. இந்நிலையில் திட்டமிட்டபடி மே 3ஆம் தேதி தேர்வு தொடங்கும் என தெரிவிக்கப்பட்டுள்ளது.