தமிழக பள்ளிக்கல்வித்துறையின் முதன்மை உடற்கல்வி ஆய்வாளர் சார்பாக பள்ளி தலைமை ஆசிரியர்களுக்கு அனுப்பப்பட்டுள்ள சுற்றறிக்கையில், உடற்கல்வியை முழுமையாக நடைமுறைப்படுத்தும் அடிப்படையில் அனைத்து அரசு, அரசு உதவி பெறும் பள்ளிகளில், உடற்கல்வி பாடங்களை மாணவர்களுக்கு நடத்த வேண்டும். இதையடுத்து மாணவர்களின் விளையாட்டு திறனை வளர்க்க உடற்கல்வி ஆசிரியர்கள் தேவையான நடவடிக்கைகள் மேற்கொள்ள வேண்டும். அதன்பின் உலக உடற்திறனாய்வு தேர்வை 6- 8ஆம் வகுப்பு வரையிலான மாணவ-மாணவியருக்கு நடத்த வேண்டும்.
ஒவ்வொரு வாரமும் வெள்ளிக்கிழமைகளில் மாணவர்களுக்கு, கூட்டாக உடற்பயிற்சி அளிக்க வேண்டும். மாணவ – மாணவிகளை இரு அணிகளாக பிரித்து அவர்களுக்கு ஏற்ற விளையாட்டுகளை விளையாட வைத்து, ஊக்கப்படுத்த வேண்டும். மேலும் ஒவ்வொரு மாணவரையும் பள்ளியில் ஏதாவது ஒரு விளையாட்டில் கலந்துகொள்ள பயிற்சி அளிக்க வேண்டும். அதனை தொடர்ந்து உடற்பயிற்சிக்கான பாட குறிப்புகள், விளையாட்டு உபகரணங்களை மாணவர்களுக்கு வழங்கி, விளையாட வைத்த பதிவேடு, உடல் திறனாய்வு தேர்வு பதிவேடு உள்ளிட்ட ஆவணங்களை முறைப்படி பராமரித்து அதிகாரிகளின் ஆய்வில் சமர்ப்பிக்க வேண்டும்.