பெரம்பலூர் மாவட்டம் செட்டிகுளம் தண்டாயுதபாணி கோவிலில் நேற்று முன்தினம் தமிழ் வருடப்பிறப்பை முன்னிட்டு படி பூஜை விழா நடைபெற்றது.
பெரம்பலூர் மாவட்டத்தில் உள்ள செட்டிகுளம் மலையில் சிறப்பு வாய்ந்த பாலதண்டாயுதபாணி கோவில் உள்ளது. மற்ற முருகன் கோவில்களில் முருகப்பெருமானின் கையில் வேல் இருக்கும். ஆனால் இந்த தலத்தில் வேலுக்கு பதிலாக முருகர் செங்கரும்பு ஏந்தி நிற்கிறார். இதனால் “செங்கரும்பு ஏந்திய செந்தில் ஆண்டவர்” என்ற சிறப்பு பெயரும் உண்டு. இங்கு தமிழ் வருட பிறப்பை முன்னிட்டு நேற்று முன்தினம் படி பூஜை விழா நடைபெற்றது.
சந்தனம் பூசப்பட்டு, பூக்கள் வைத்து படிகளுக்கு சிறப்பு பூஜைகள் மற்றும் தீபாராதனை நடைபெற்றது. இந்த படி பூஜை விழாவில் கொரோனா தொற்று பரவல் காரணமாக குறைவான எண்ணிக்கையில் பக்தர்கள் கலந்து கொண்டு தரிசனம் பெற்றனர். இதற்கான முன்னேற்பாடுகளை எழுத்தர் தண்டபாணி தேசிகன், கோவில் செயல் அலுவலர் ஜெயலதா மற்றும் கோவில் நிர்வாகிகள் செய்திருந்தனர்.