மர்மமான முறையில் இறந்து கிடந்த போலீஸ் ஏட்டின் சடலத்தை காவல்துறையினர் கைப்பற்றியுள்ளனர்
சென்னை மாவட்டத்தில் உள்ள ஐ.சி.எப். பகுதியில் போலீஸ் ஏட்டான ஆரோக்கியசாமி என்பவர் வசித்து வந்துள்ளார். இவர் தன்னுடன் பணிபுரியும் ஜெயபிரகாஷ் என்பவரை தரக்குறைவாக பேசி, கிண்டல் செய்துள்ளார். இதனால் ஜெயபிரகாஷ் ஆரோக்கியசாமியை கண்டித்துள்ளார். இந்நிலையில் நேற்று மீண்டும் ஆரோக்கியசாமி ஜெயபிரகாசிடம் தகராறு செய்துள்ளார். மேலும் ஆரோக்கியசாமி தான் மறைத்து வைத்திருந்த கத்தியை கொண்டு ஜெயபிரகாசை சரமாரியாக குத்தியுள்ளார். இதில் படுகாயம் அடைந்த அவரை அருகில் இருந்தவர்கள் மீட்டு சிகிச்சைக்காக அரசு மருத்துவமனையில் அனுமதித்துள்ளனர். அங்கு அவருக்கு தீவிர சிகிச்சை அளிக்கப்பட்டு வருகிறது.
இதுகுறித்து வழக்குப்பதிவு செய்த காவல்துறையினர் ஆரோக்கியசாமியிடம் விசாரிப்பதற்காக அவரது வீட்டிற்கு சென்றுள்ளனர். அப்போது அங்கு ஆரோக்கியசாமி சுயநினைவு இன்றி கிடந்துள்ளார். இதனை பார்த்து அதிர்ச்சி அடைந்த காவல்துறையினர் ஆரோக்கியசாமியை மீட்டு சிகிச்சைக்காக அரசு மருத்துவமனைக்கு கொண்டு சென்றனர். ஆனால் அங்கு அவரை பரிசோதித்த மருத்துவர் அவர் ஏற்கனவே இறந்துவிட்டதாக தெரிவித்துள்ளார். மேலும் இதுகுறித்து காவல்துறையினர் ஆரோக்கியசாமி விசாரணைக்கு பயந்து தற்கொலை செய்து கொண்டாரா? அல்லது மாரடைப்பால் இறந்தாரா? என்பது குறித்து தீவிர விசாரணை மேற்கொண்டு வருகின்றனர்.