கட்டுப்பாட்டை இழந்த கார் தலைகுப்புற கவிழ்ந்த விபத்தில் பெண் உயிரிழந்த நிலையில், 6 பேர் மருத்துவமனையில் அனுமதிக்கப்பட்டுள்ள சம்பவம் பரபரப்பை ஏற்படுத்தியுள்ளது.
கிருஷ்ணகிரி மாவட்டத்தில் உள்ள காந்தி சாலையில் எலக்ட்ரீசியனான நந்தகுமார் என்பவர் வசித்து வருகிறார். இவருக்கு சந்தியா என்ற மனைவி உள்ளார். இந்த தம்பதிகளுக்கு பிரதீஷ் என்ற மகன் உள்ளார். இந்நிலையில் நந்தகுமார் தனது மனைவி, மகன் மற்றும் உறவினர்கள் கோகிலா, சீதாலட்சுமி, ஜெயலட்சுமி, கனிமொழி ஆகியோருடன் திருச்செந்தூர் முருகன் கோவிலுக்கு சாமி கும்பிடுவதற்காக காரில் சென்றுள்ளார். இவர்கள் கரூர்-திண்டுக்கல் நான்கு வழிச்சாலையில் குடகனாறு பாலத்தின் முன்பு சென்று கொண்டிருந்த போது திடீரென ஓட்டுநரின் கட்டுப்பாட்டை இழந்த கார் சாலையில் தாறுமாறாக ஓடியது.
இதனை அடுத்து சாலையின் நடுவில் இருக்கும் பள்ளத்தில் கவிழ்ந்து கார் விபத்துக்குள்ளானது. இந்த விபத்தில் சீதாலட்சுமி சம்பவ இடத்திலேயே பரிதாபமாக உயிரிழந்துவிட்டார். அதன்பின் படுகாயமடைந்த 6 பேரையும் மீட்டு அரசு மருத்துவமனைக்கு சிகிச்சைக்காக அனுப்பி வைத்துள்ளனர். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று சீதாலட்சுமியின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.