தாமிர கம்பியை திருட முயன்ற மர்ம நபரை காவல்துறையினர் கைது செய்துள்ளனர்.
புதுக்கோட்டை மாவட்ட த்தில் உள்ள அத்திப்பள்ளம் கிராமத்தில் புதிதாக அரிசி ஆலை ஒன்று அமைக்கப்பட்டுள்ளது. இந்த ஆலைக்கு மின் இணைப்பு வழங்குவதற்காக மின் மாற்றி அமைக்கும் பணிகள் நடைபெற்று வந்தது. தற்போது பணிகள் நிறைவடைந்து மின்விநியோகம் வழங்கப்பட்டது. இந்நிலையில் நேற்று முன்தினம் இரவு மர்ம நபர் ஒருவர் மின்மாற்றியின் மேலே ஏறி தாமிர கம்பியை திருட முயன்றுள்ளார். இதனை பார்த்த அப்பகுதி மக்கள் அந்த மர்ம நபரை பிடிக்க முயன்றனர்.
இந்நிலையில் அவர் மின்மாற்றி மேலே இருந்து கீழே குதித்து தப்பி ஓட முயன்றுள்ளார். ஆனால் பொதுமக்கள் அந்த மர்ம நபரை விரட்டி சென்று மடக்கி பிடித்து காவல் நிலையத்தில் ஒப்படைத்துள்ளனர். இதுகுறித்து வழக்கு பதிவு செய்த காவல்துறையினர் அந்த மர்ம நபரிடம் நடத்திய விசாரணையில் அவர் ஒளியமங்கலம் கிராமத்தை சேர்ந்த ராஜா என்பது தெரியவந்துள்ளது. இந்த சம்பவம் அப்பகுதியில் பரபரப்பை ஏற்படுத்தியுள்ளது.