திண்டுக்கல் கொடைக்கானலில் டிரைவரின் கட்டுப்பாட்டை இழந்த லாரி பல்கலைக்கழக பேருந்தின் மீது மோதி விபத்துக்குள்ளானதில் போக்குவரத்து பாதிப்பு ஏற்பட்டது.
கேரள மாநிலத்தில் உள்ள கொச்சிக்கு கொய்மலர்கள் ஏற்றுக்கொண்டு திண்டுக்கல் மாவட்டம் மன்னவனூர் கிராமத்தில் இருந்து லாரி ஒன்று சென்றுள்ளது. அந்த லாரியை சதீஷ் என்பவர் ஓட்டியுள்ளார். லாரி கொடைக்கானல் பகுதியில் உள்ள மூஞ்சிக்கல் மலைபாதையில் சென்று கொண்டிருந்த போது எதிர்பாராதவிதமாக டிரைவரின் கட்டுப்பாட்டை இழந்து சாலையில் தாறுமாறாக ஓடியது. அதன்பின் அங்கு வந்து கொண்டிருந்த அன்னைதெரசா பல்கலைக்கழக பேருந்தின் மீது லாரி வேகமாக மோதியது.
அதனை தொடர்ந்து அந்த பகுதியில் சென்று கொண்டிருந்த கார், ஜீப் ஆகிய வாகனங்கள் அடுத்தடுத்து மோதி விபத்துக்குள்ளானது. இந்த விபத்தில் மூன்றும் வாகனங்களும் சேதமடைந்துள்ளது. அன்னை தெரசா பல்கலைக்கழகம் பேருந்தில் பயணித்த 50 மாணவர்கள் காயங்கள் எதுவும் இன்றி உயிர்தப்பினர். இந்த சம்பவத்தால் மூஞ்சிக்கல் பகுதியில் சிறிது நேரம் போக்குவரத்து பாதிப்பு ஏற்பட்டுள்ளது. இந்த விபத்து குறித்து கொடைக்கானல் காவல்துறையினர் வழக்குப்பதிந்து விசாரணை மேற்கொண்டு வருகின்றனர்.