தர்மபுரி மாவட்டத்தில் உள்ள பெரியவீட்டுகொட்டாய் கிராமத்தில் மணிகண்டன்(25) என்பவர் வசித்து வந்துள்ளார். இவர் பி.பி.ஏ படித்து முடித்துள்ளார். இந்நிலையில் மணிகண்டன் தாதகவுண்டன்கொட்டாய் பகுதியில் வசிக்கும் கார்த்திக்(29), ஆனந்த்(25), கபில்(19), மூர்த்தி(16), மஞ்சுநாதன்(26) ஆகியோருடன் சபரிமலைக்கு மாலை அணிந்து செல்ல நினைத்தார். அவர்கள் 6 பேரும் நேற்று முன்தினம் நாகாவதி அணையில் குளிப்பதற்காக சரக்கு வாகனத்தில் சென்றுள்ளனர். அணையில் குளித்துவிட்டு இரவு நேரத்தில் அவர்கள் சரக்கு வாகனத்தில் நல்லம்பள்ளி நோக்கி சென்று கொண்டிருந்தனர்.
இந்த வாகனத்தை மஞ்சுநாதன் ஓட்டி சென்றுள்ளார். இந்நிலையில் சென்றாயன்கொட்டாய் பகுதியில் சென்ற போது ஓட்டுநரின் கட்டுப்பாட்டை இழந்த சரக்கு வாகனம் தாறுமாறாக ஓடி சாலையில் கவிழ்ந்தது. இந்த விபத்தில் மணிகண்டன் சம்பவ இடத்திலேயே பரிதாபமாக உயிரிழந்தார். இதனையடுத்து படுகாயமடைந்த கபில், ஆனந்த், மஞ்சுநாதன், கார்த்திக், மூர்த்தி ஆகிய 5 பேரையும் அக்கம் பக்கத்தினர் மீட்டு தருமபுரி அரசு மருத்துவமனைக்கு சிகிச்சைக்காக அனுப்பி வைத்தனர். இந்த சம்பவம் குறித்து வழக்குபதிவு செய்த போலீசார் விசாரணை நடத்தி வருகின்றனர்.