விருதுநகர் மாவட்டம் திருச்சுழி பகுதியிலுள்ள ஆலடிபட்டி, தம்மநாயக்கன்பட்டி, இராமசாமிபட்டி கிராமங்களில் விவசாயிகள் ஏராளமானோர் வீடுகளில் சுமார் 2 ஆயிரத்திற்கும் மேற்பட்ட ஆடுகளை வளர்த்து வருகின்றனர். தற்போது சில நாட்களாக ஆடுகள் கழிச்சல் ஏற்பட்டு காணப்படுவதாகவும், திடீரென்று மயங்கி விழுந்து உயிரிழப்பு ஏற்படுவதாகவும் இப்பகுதி மக்கள் கூறுகின்றனர்.
இதுவரையிலும் மர்மநோய் தாக்கி சுமார் 30-க்கும் மேற்பட்ட ஆடுகள் இறந்தாக கூறப்படுகிறது. இதனால் கால்நடை மருத்துவர்கள் சம்மந்தப்பட்ட பகுதிக்கு சென்று சிகிச்சை மேற்கொள்ள வேண்டுமென விவசாயிகள் கோரிக்கை விடுத்துள்ளனர். இது தொடர்பாக ஆலடிபட்டியைச் சேர்ந்த விவசாயிகள் கூறியபோது, எங்கள் பகுதியில் உள்ள மக்கள் விவசாய பணிகள் முடிந்த பின்பு ஆடு வளர்க்கும் தொழில் ஈடுபடுகிறார்கள்.
தற்போது சில நாட்களாக மர்ம நோயால் ஆடுகள் சிரமப்பட்டு திடீரென்று மயங்கி விழுந்து உயிரிழக்கின்றன. இதன் காரணமாக விவசாயிகளுக்கு பல ஆயிரம் ரூபாய் நஷ்டம் ஏற்படுகிறது. அதுமட்டுமல்லாமல் மர்ம நோய் தாக்காமல் இருக்க கால்நடை துறை அதிகாரிகள் கண்காணித்து சிகிச்சை அளிக்க வேண்டும் என கூறினர்.