திருமலை திருப்பதி தேவஸ்தானம் இணையதளத்தில் இன்று மாலை 3 மணியில் இருந்து ஜனவரி, பிப்ரவரி மாதங்களுக்கான ஸ்ரீவாணி அறக்கட்டளை வி.ஐ.பி. பிரேக் தரிசன டிக்கெட்டுகள் வெளியிடப்படுகிறது. இதில் ஜனவரி1-ஆம் தேதி ஆங்கில புத்தாண்டு அன்று 1,000 விஐபி பிரேக் தரிசன டிக்கெட்டுகளும் (ரூ.10,000 நன்கொடை+ ரூ.500 பிரேக் தரிசன டிக்கெட்) தேவஸ்தான இணையதள முன்பதிவில் வைக்கப்பட இருக்கிறது. ஜனவரி 13-ஆம் தேதி வைகுண்ட ஏகாதசி அன்று 1,000 மகா லகு தரிசனம் (ரூ.10,000 + ரூ.300) டிக்கெட்டுகள் வெளியிடப்பட இருக்கிறது. ஜனவரி14-ஆம் தேதி முதல் 22-ஆம் தேதி வரை 9 நாள்களுக்கு தினசரி 2,000 லகு தரிசன (ரூ.10,000 + ரூ.500) டிக்கெட்டுகளும் வெளியிடப்பட இருக்கிறது.
மேலும் ஜனவரி மற்றும் பிப்ரவரி மாதங்களில் மேலேயுள்ள நாட்களை தவிா்த்து மற்ற தினங்களில் திங்கள்கிழமை முதல் வெள்ளிக்கிழமை வரை 200 டிக்கெட்டுகளும், சனி மற்றும் ஞாயிற்றுக்கிழமைகளில் 300 டிக்கெட்டுகளும் (ரூ.10,000+ ரூ.500) இவற்றுடன் முன்பதிவில் வைக்கப்பட இருக்கிறது.
திருமலை திருப்பதி தேவஸ்தானத்தில் நேற்று காலை வெளியிடப்பட்ட சா்வ தரிசன இணையதளம் முன்பதிவு டிக்கெட்டுகள் 15 நிமிடங்களில் முடிவடைந்துவிட்டது.
தினசரி 10,000 டிக்கெட்டுகள், வைகுண்ட ஏகாதசி பரமபத வாயில் திறப்பு நாள்களில் தினசரி 5 ஆயிரம் டிக்கெட்டுகள் என வெளியிடப்பட்ட நிலையில் அவற்றை முன்பதிவு செய்ய பெரும்பாலான பக்தா்கள் ஒரே நேரத்தில் முயன்றதால் பலரால் டிக்கெட்டுகளை முன்பதிவு செய்ய முடியாத நிலை ஏற்பட்டது. அதன்பின் வெளியிடப்பட்ட டிக்கெட்டுகள் அனைத்தும் 15 நிமிடத்தில் முன்பதிவு செய்யப்பட்டதால் ஏராளமான பக்தா்கள் ஏமாற்றமடைந்தனா்.