குடிநீர் வழங்க கோரி வெங்கத்தான்குடியில் பொதுமக்கள் சாலை மறியல் போராட்டத்தில் ஈடுபட்டனர். இதனால் அப்பகுதியில் கடும் போக்குவரத்து நெரிசல் ஏற்பட்டது
திருவாரூர் மாவட்டம், கோட்டூர் அடுத்து வெங்கத்தான்குடி ஊராட்சி ஆற்றங்கரை தெருவில் 30-க்கும் மேற்பட்ட குடும்பத்தினர் வசித்து வருகின்றனர். இவர்களுக்கு தென்பரை பாமணி ஆற்று படுகையில் அமைந்துள்ள ஆழ்குழாய் கிணற்றின் வழியாக குடிநீர் வினியோகம் செய்யப்பட்டு வருகிறது.இந்நிலையில் கடந்த சில ஆண்டுகளாக குடிநீர் வரவில்லை. இதனால் அந்த பகுதி மக்கள் கைப்பம்பு மூலம் வரும் உப்பு நீரை தான் குடிநீராக பயன்படுத்துகின்றனர். குடிநீர் வசதி செய்துதர அதிகாரிகளிடம் மனு கொடுத்தும் எந்தவித நடவடிக்கையும் எடுக்காததால் அவர்களை கண்டித்து, உடனடியாக குடிநீர் வழங்க வலியுறுத்தி அப்பகுதி பொதுமக்கள் வெங்கத்தான்குடியில் காலி குடங்களுடன் சாலை மறியலில் ஈடுபட்டனர்.
இந்த மறியல் போராட்டத்திற்கு இந்திய கம்யூனிஸ்டு கட்சி கிளை செயலாளர் மற்றும் தி.மு.க. பிரமுகர் ஆகியோர் தலைமை தாங்கினர்.இதுகுறித்து தகவல் அறிந்த அப்பகுதி போலீசார் சம்பவ இடத்திற்கு வந்து மறியலில் ஈடுபட்டவர்களிடம் பேச்சுவார்த்தை நடத்தினர். இதில் சம்பந்தப்பட்ட துறை அதிகாரிகளுக்கு தகவல் கொடுத்து உரிய நடவடிக்கை எடுக்கப்படும் என உறுதியளித்தனர். உறுதியளித்ததையடுத்து மறியலில் ஈடுபட்டவர்கள் களைந்து சென்றனர்.