தமிழகத்தில் கொரோனா இரண்டாம் அலை பரவல் அதிகரித்ததால், பாதிப்பு மற்றும் பலி எண்ணிக்கை அதிகரித்ததன் காரணமாக கடுமையான முழு ஊரடங்கு அமல்படுத்தப்பட்டது. இதன் பின்னர் தொற்றுப் பரவல் கட்டுக்குள் வந்ததையடுத்து ஊரடங்கில் தளர்வுகள் அளிக்கப்பட்டு பல்வேறு தளர்வுகளும் படிப்படியாக கொடுக்கப்பட்டு வருகிறது. தற்போது நடைமுறையில் இருக்கும் ஊரடங்கு செப்டம்பர் 6ஆம் தேதி வரை நீட்டிக்க படுவதாக தமிழக அரசு அறிவித்துள்ளது. அதன்படி தமிழகத்தில் கூடுதல் தளர்வுகளுடன் கூடிய ஊரடங்கு நீட்டிப்பு இன்று காலை 6 மணி முதல் அமலுக்கு வந்துள்ளது.
இந்நிலையில் தமிழகத்தில் கூடுதல் தளர்வுகள் அறிவிக்கப்பட்டாலும், வெள்ளி, சனி மற்றும் ஞாயிறு ஆகிய மூன்று நாட்கள் கோவில்களில் பக்தர்களுக்கு தடை விதித்து முதல்வர் ஸ்டாலின் உத்தரவிட்டுள்ளார். அதாவது கொரோனா தொற்று பரவலை கட்டுப்படுத்தவே வழிபாட்டு தலங்களுக்கு கட்டுப்பாடுகள் நீடிக்கப்பட்டுள்ளதாக அரசு விளக்கமளித்துள்ளது. ஆனால் பள்ளி மாணவ மாணவிகளுக்கு கொரோனா தொற்று பரவாது என்ற நம்பிக்கை உள்ளதாகவும் கூறியுள்ளது.