தீவிர கட்டுப்பாடுகளுடன் அண்ணாத்த படப்பிடிப்பு நடைபெறும் என்று தயாரிப்பு நிறுவனம் கூறியுள்ளது.
தமிழ் திரையுலகில் சூப்பர் ஸ்டாராக வலம் வரும் ரஜினிகாந்த் நடிப்பில் தயாராகும் ‘அண்ணாத்த’ படத்தை இயக்குனர் சிவா இயக்குகிறார். மேலும் இந்த படத்தில் மீனா, குஷ்பூ, கீர்த்தி சுரேஷ், நயன்தாரா, சூரி, பிரகாஷ்ராஜ் என பல முன்னணி நடிகர்கள், நடிகைகள் நடிக்கவுள்ளனர். இந்த படத்தின் இரண்டு கட்ட படப்பிடிப்புகள் கடந்த பிப்ரவரி மாதம் ஹைதராபாத்தில் நடைபெற்றது. அடுத்த கட்ட படப்பிடிப்பிற்காக படக்குழு தயாரான நிலையில் கொரோனா ஊரடங்கால் தாமதமானது. கொரோனாவின் தாக்கம் குறைந்த பின் படப்பிடிப்பு தொடங்கப்படும் என கூறப்பட்டது. இதற்கிடையில் நடிகர் ரஜினி வருகிற டிசம்பர் 31ஆம் தேதி கட்சி தொடங்க உள்ளதாகவும், கட்சி வேலைகள் தீவிரமாகும் முன் ‘அண்ணாத்த’ படத்தின் மீதமுள்ள படப்பிடிப்பை முடித்துக் கொடுப்பதாகவும் அறிவித்திருந்தார்.
இந்நிலையில் அண்ணாத்த படப்பிடிப்பு பாதுகாப்புடன் நடைபெறுவது குறித்து தயாரிப்பு நிறுவனத்தின் நிர்வாகி பேட்டியளித்துள்ளார். அதில் ‘அண்ணாத்த படத்தின் மீதமுள்ள 40 % படப்பிடிப்பு ஹைதராபாத் ராமோஜி பிலிம் சிட்டியில் நடத்த திட்டமிட்டுள்ளோம். நடிகர் ரஜினிக்கு ஐதராபாத் செல்ல தனி விமானம் ஏற்பாடு செய்யப்பட்டுள்ளது . படப்பிடிப்பில் கலந்து கொள்பவர்கள் தவிர மற்றவர்கள் படப்பிடிப்பு தளத்திற்குள் நுழைய அனுமதி கிடையாது. அதேபோல் படப்பிடிப்பில் கலந்து கொள்பவர்கள் வெளியே சென்றுவிட்டு மீண்டும் உள்ளே நுழையவும் முடியாது. குறிப்பிட்ட சில நாட்களில் மருத்துவரின் பரிந்துரைப்படி கொரோனா பரிசோதனை எடுக்கப்படும். தீவிர பாதுகாப்புடன் அண்ணாத்த படப்பிடிப்பை நடத்தி முடிப்போம். டிசம்பர் 14ம் தேதியிலிருந்து 40 நாட்கள் நடிகர் ரஜினியின் படப்பிடிப்பு இருக்கும். அதன்பின்னர் அவர் சென்னை திரும்பிவிடுவார்’ என்றார் . மேலும் இந்த படத்தை 2021 சட்டமன்ற தேர்தலுக்கு பிறகு வெளியிட திட்டமிட்டுள்ளோம் என்றும் கூறியுள்ளார்.