வாகன சோதனையின் போது வசமாக சிக்கிய 5 பேரை காவல்துறையினர் கைது செய்துள்ளனர்.
மயிலாடுதுறை மாவட்டத்திலுள்ள நீடூர் ரயில்வே கேட் பகுதியில் காவல்துறையினர் தீவிர வாகன சோதனையில் ஈடுபட்டுள்ளனர். அப்போது அவ்வழியாக வந்த காரை நிறுத்தி காவல்துறையினர் சோதனையிட்டனர். அதில் ஏர்கன்மாடல் துப்பாக்கி ஒன்று இருந்தது. பின்னர் காவல்துறையினர் அந்த துப்பாக்கியை கைப்பற்றி காரிலிருந்தவர்களிடம் விசாரணை நடத்தியதில் அவர்கள் முன்னுக்கு பின்னாக பதிலளித்தனர். இதனையடுத்து காவல்துறையினர் அந்த காரை பறிமுதல் செய்ததோடு, அதிலிருந்த 5 பேரையும் காவல்நிலையத்திற்கு அழைத்து சென்று விசாரணை நடத்தியுள்ளனர்.
அதில் அவர்கள் ஜெகபர்அலி, சாதிக்பாட்சா, ரகமத், முகமது இர்பான், முகமது ஆசிப் என்பது தெரியவந்துள்ளது. மேலும் முகமது ஆசிப் மீது காவல்நிலையங்களில் பல்வேறு வழக்குகள் இருப்பதும் தெரியவந்துள்ளது. இதனையடுத்து அவர்கள் 5 பேர் மீதும் ஆயுதத் தடுப்பு சட்டத்தின் கீழ் வழக்கு பதிந்த காவல்துறையினர் அவர்களை கைது செய்து நீதிமன்றத்தில் ஆஜர்படுத்தி சிறையில் அடைத்தனர்.