துணை ஜனாதிபதி தேர்தலில் எதிர்க்கட்சி வேட்பாளர் தேர்ந்தெடுக்கப்பட்டுள்ளார்.
இந்தியாவின் துணை ஜனாதிபதியாக வெங்கையா நாயுடு இருக்கிறார். இவருடைய பதவிக்காலம் ஆகஸ்ட் 10-ஆம் தேதி முடிவடைகிறது. இதன் காரணமாக ஆகஸ்ட் 6-ஆம் தேதி துணை ஜனாதிபதி தேர்தலை நடத்துவதற்கு தேர்தல் கமிஷன் முடிவு செய்துள்ளது. இந்த தேர்தலுக்கான வேட்பு மனு தாக்கல் கடந்த 5-ம் தேதி தொடங்கப்பட்டு 19-ஆம் தேதியுடன் முடிவடைகிறது. இந்த தேர்தலில் வேட்பு மனு தாக்கல் செய்தவர்கள் ஜூலை 22-ஆம் தேதி வரை வேட்பு மனுவை திரும்ப பெற்றுக் கொள்ளலாம்.
இந்நிலையில் தேர்தல் முடிவடைந்த பிறகு உடனடியாக வாக்கு எண்ணப்பட்டு முடிவுகள் வெளியிடப்படும் என தேர்தல் கமிஷன் அறிவித்துள்ளது. இதனையடுத்து பாஜக சார்பில் துணை ஜனாதிபதி போட்டிக்கு மேற்கு வங்காள மாநில கவர்னர் ஜெகதீப் தன்கர் வேட்பாளராக அறிவிக்கப்பட்டுள்ளார். தற்போது எதிர்கட்சிகளின் சார்பில் தேர்தலில் போட்டியிடும் வேட்பாளர் அறிவிக்கப்பட்டுள்ளார். அதன்படி உத்தரகாண்ட், ராஜஸ்தான், கோவா, குஜராத் ஆகிய மாநிலங்களின் கவர்னராக இருந்த மார்கரெட் ஆல்வா வேட்பாளராக தேர்ந்தெடுக்கப்பட்டுள்ளார்.