கல்குவாரி குட்டையில் மூழ்கி வாலிபர் பலியான சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள முகப்பேர் கிழக்கு பகுதியில் தேவசாமிநாதன் என்பவர் வசித்து வருகிறார்.இவருக்கு தினேஷ்தேவா(23) என்ற மகள் இருந்துள்ளார். இவர் வேலப்பன்சாவடியில் இருக்கும் தனியார் கல்லூரியில் 3-ஆம் ஆண்டு படித்து வந்துள்ளார். இந்நிலையில் தினேஷ்தேவா நண்பர்களுடன் நேற்று முன்தினம் சிக்கராயபுரத்தில் இருக்கும் கல்குவாரி குட்டையில் குளிப்பதற்காக சென்றுள்ளார். இதனை அடுத்து நீச்சல் தெரியாத தினேஷ்தேவா தெர்மாகோல் உதவியுடன் குளித்துக் கொண்டிருந்த போது எதிர்பாராதவிதமாக தண்ணீரில் மூழ்கிவிட்டார். இதனை பார்த்து அதிர்ச்சி அடைந்த நண்பர்கள் அவரை மீட்க முயற்சி செய்தனர்.
ஆனால் அவர்களால் தினேஷை மீட்க முடியாததால் உடனடியாக தீயணைப்பு துறையினருக்கு தகவல் தெரிவித்தனர். அந்த தகவலின்படி சம்பவ இடத்திற்கு விரைந்து சென்ற தீயணைப்பு நிலைய வீரர்கள் நீண்ட நேர போராட்டத்திற்கு பிறகு தினேஷ்தேவாவின் சடலத்தை மீட்டனர். அதன்பிறகு வாலிபரின் உடல் குரோம்பேட்டை அரசு மருத்துவமனைக்கு பிரேத பரிசோதனைக்காக அனுப்பி வைக்கப்பட்டது. இந்த சம்பவம் குறித்து வழக்குப்பதிவு செய்த காவல்துறையினர் விசாரணை நடத்தி வருகின்றனர்.