நேப்பியர் பாலம் வழியாக வாகனம் ஓட்டி செல்வோர்களை துரத்தி ஊரடங்கு காலங்களில் சத்தமில்லாமல் போலீசாருக்கு ஒரு நாய் மறைமுகமாக உதவி செய்து வருவது ஆச்சர்யத்தை ஏற்படுத்தி வருகிறது.
ஞாயிற்றுக்கிழமை தோறும் தளர்வுகள் இல்லாத முழுமையான ஊரடங்கு கடைபிடிக்கப்பட்டு வருகிறது. அந்த சமயம் சாலையில் யாரும் நடமாடாமல் இருக்க போலீசார் தீவிரமாக கண்காணித்து வருகிறார்கள். ஆனால் மெரினா கடற்கரை அருகே இருக்கும் நேப்பியர் பாலத்தில் நின்றுகொண்டு, அந்த வழியாக வரும் வாகன ஓட்டிகளை துரத்தி ஊரடங்கு நேரத்தில் சத்தம் ஏதுமில்லாமல் காவலர்களுக்கு ஒரு நாய் மறைமுகமாக உதவி செய்து வருகின்றது. அதே நேரத்தில் போலீஸ் வாகனங்கள் மற்றும் ஆம்புலன்ஸ் வாகனங்கள் சென்றால் இந்த நாய் அமைதியாக இருந்து விடுகிறது. அந்த நேரத்தில் குரைப்பதுமில்லை பின்தொடர்வதுமில்லை.
நோயின் தாக்கம் பற்றி தெரியாமல் ஊரடங்கு நேரத்தில் தேவை இல்லாமல் வெளியே சுற்றக் கூடாது என்ற எண்ணம் கூட சிலருக்கு இல்லாத நிலையில் சாலையில் செல்பவர்களை இந்த நாய் விரட்டுவது அனைவரையும் ஆச்சர்யப்பட வைத்துள்ளது. இச்செயல் பற்றி அந்த பகுதியில் பாதுகாப்பு பணியில் இருக்கும் போக்குவரத்து காவலர் சிலர் கூறுகையில், “நாங்கள் சாப்பிடும் பொழுது இந்த நாய்க்கு சேர்த்து சில நேரங்களில் சாப்பாடு கொடுப்போம் ஊரடங்கு காலத்தில் போலீசாருக்கு உதவி செய்யும் வகையில் இந்த நாய் செயல்படுவது மிகவும் வியப்பை தந்துள்ளது. மேலும் போலீஸ் ஜீப்புகள் செல்லும்போது இந்த நாய் அமைதியாக இருந்து விடுகிறது. மற்ற வாகனங்களில் செல்பவர்களை இந்த நாய் விரட்டுவதால், மறுமுறை அவர்கள் இந்த வழியாக வருவதற்கு பயப்படுகிறார்கள்” என்று அவர்கள் கூறியுள்ளார்கள்.