தொழிலில் தனது பங்குகளை பெறுவதற்கு அந்தரங்கப் படங்களைக் காட்டி முன்னாள் காதலியை மிரட்டிய நபர் மும்பை காவல்துறையினரால் கைது செய்யப்பட்டுள்ளார்.
இளைஞர் ஒருவர், இளம்பெண்ணுக்கு வியாபாரத்தில் 30 சதவீத பங்குகளை தனக்கு தர வேண்டும் என்று மிரட்டி வந்துள்ளார். இவருக்கும், அந்த பெண்ணுக்கும் ஏற்கனவே பழக்கம் இருந்துள்ளது. அப்போது எடுக்கப்பட்ட புகைப்படங்களை பயன்படுத்தி தொடர்ந்து மிரட்டல் விடுத்து வந்துள்ளார். அந்த இளம்பெண் வேறு நண்பர்கள் இருவருடன் சேர்ந்து பிப்ரவரி 2021 இல் தொழிலைத் தொடங்கினார். குற்றம் சாட்டப்பட்டவர் அவர்களில் ஒருவரின் சகோதரர் ஆவார்.
அவர்கள் வணிக கூட்டங்களில் சந்தித்து காதலித்து வந்துள்ளனர். பின்னர் இந்த ஜோடி திருமணம் செய்து கொள்ள முடிவு செய்திருந்தனர். ஆனால் அந்த இளைஞன் கடந்த டிசம்பரில் உறவை முடித்துக் கொள்வதாக அந்தப் பெண்ணிடம் கூறியுள்ளார். மேலும் தொழிலில் லாபம் தராவிட்டால் தனிமையில் எடுத்துக்கொண்ட புகைப்படங்களை உங்களது உறவினருக்கு அனுப்பி விடுவதாக மிரட்டல் விடுத்துள்ளார். அந்த இளைஞனின் தொல்லை தாங்காமல் அந்த இளம்பெண் காவல் துறையை அணுகி புகார் கொடுத்துள்ளார். இந்த புகாரின் அடிப்படையிலேயே அவரை காவல்துறையினர் கைது செய்துள்ளனர்.