நடிகை திரிஷா நடிப்பில் உருவாகியுள்ள ராங்கி திரைப்படம் ஓடிடியில் ரிலீஸாக உள்ளதாக தகவல் வெளியாகியுள்ளது.
தமிழ் திரையுலகில் முன்னணி கதாநாயகியாக வலம் வரும் திரிஷா நடிப்பில் உருவான பரமபதம் விளையாட்டு படம் கடந்த தமிழ் புத்தாண்டு தினத்தில் ஓடிடியில் வெளியானது. இந்த படத்தில் ரிச்சர்ட்ஸ், நந்தா, வேல ராமமூர்த்தி உள்ளிட்ட பலர் நடித்திருந்தனர். இந்த படம் ரசிகர்களிடையே ஓரளவு வரவேற்பை பெற்றது. இந்நிலையில் திரிஷா நடிப்பில் உருவாகியுள்ள ராங்கி திரைப்படமும் ஓடிடியில் ரிலீஸாக இருப்பதாக தகவல்கள் வெளியாகியுள்ளது.
இந்த படத்தின் டீஸர் ஒரு வருடத்திற்கு முன்பு வெளியாகி ரசிகர்களிடையே நல்ல வரவேற்பை பெற்றது. ராங்கி படத்தில் நடிகை திரிஷா அதிரடி ஆக்சன் காட்சிகளில் ரிஸ்க் எடுத்து நடித்துள்ளார் என்பது குறிப்பிடத்தக்கது. மேலும் இந்தப் படத்தில் பிரபல மலையாள நடிகர் அனாஸ்வர ராஜன் முக்கிய கதாபாத்திரத்தில் நடித்துள்ளார். எங்கேயும் எப்போதும் பட இயக்குனர் சரவணன் இயக்கியுள்ள இந்த படத்தை லைக்கா நிறுவனம் தயாரித்துள்ளது . விரைவில் இந்த படத்தின் ஓடிடி ரிலீஸ் குறித்த அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.