தமிழில் முனியாண்டி, விலங்கியல் மூன்றாமாண்டு, கொடைக்கானல், கந்தகோட்டை, துரோகி, காப்பான் ஆகிய திரைப்படங்களில் நடித்துள்ள பூர்ணா மலையாளம், தெலுங்கிலும் கூட அதிக படங்களில் நடித்திருக்கிறார். சில நாட்களுக்கு முன் துபாய் தொழில் அதிபருடன் பூர்ணாவுக்கு திருமணம் நடைபெற்றது. சென்ற 2020ல் பூர்ணா திருமண மோசடி கும்பலிடம் சிக்கியது பரபரப்பாகியது. அப்போது பூர்ணாவுக்கு, ஒரு நபர் தொலைபேசியில் தொடர்பு கொண்டு துபாயில் நகைக்கடை வைத்துள்ளதாகவும், உங்களை திருமணம் செய்துகொள்ள விரும்புவதாகவும் தெரிவித்தார். அதன்பின் சிலர் பூர்ணாவை பெண் கேட்டு அவரது வீட்டுக்கும் சென்றனர்.
எனினும் பூர்ணாவிடம் பணம் கேட்டும், தங்ககடத்தலில் ஈடுபடும்படியும் மிரட்டினர். இது தொடர்பாக பூர்ணாவின் தாய் காவல் நிலையத்தில் புகாரளித்தார். அதன்படி காவல்துறையினர் விசாரணை மேற்கொண்டு ரபீக், முகமது செரீப், ரமேஷ், அஷ்ரப், ரகீம், அபுபக்கர் உட்பட 10 பேரை கைது செய்தனர். இவ்வழக்கு எர்ணாகுளம் முதன்மை செசன்ஸ் நீதிமன்றத்தில் விசாரணைக்கு வந்தது. அப்போது வழக்கை விசாரித்த நீதிபதி ஹனி வர்கீஸ் 10 குற்றவாளிகளையும் டிசம்பர் 12ஆம் தேதி நீதிமன்றத்தில் ஆஜர்படுத்த உத்தரவு பிறப்பித்தார்.