அரண்மனை-3 படத்தை விளம்பரப்படுத்த பத்திரிக்கையாளர்களை சந்தித்த சுந்தர்.சி விமர்சகர்கள் குறித்து பேசியுள்ளார்.
தமிழ் திரையுலகில் முன்னணி இயக்குனராக வலம் வரும் சுந்தர்.சி இயக்கத்தில் வெளியான அரண்மனை, அரண்மனை-2 படங்கள் சூப்பர் ஹிட் அடித்தது. தற்போது சுந்தர்.சி இயக்கத்தில் ஆர்யா, ராஷி கண்ணா, ஆண்ட்ரியா, விவேக், யோகி பாபு, சாக்ஷி அகர்வால், மனோபாலா உள்ளிட்டோர் நடிப்பில் அரண்மனை-3 திரைப்படம் உருவாகியுள்ளது. இந்த படத்தின் வெளியீட்டு உரிமையை ரெட் ஜெயன்ட் மூவிஸ் நிறுவனம் கைப்பற்றியுள்ளது. மேலும் வருகிற அக்டோபர் 14-ஆம் தேதி இந்த படம் ரிலீஸாக உள்ளது. இந்நிலையில் அரண்மனை-3 படத்தை விளம்பரப்படுத்த படக்குழுவினர் பத்திரிகையாளர்களை சந்தித்துள்ளனர். அப்போது பேசிய சுந்தர் சி, ‘நான் ஒரு எளிய பொழுதுபோக்கு கலைஞன்.
மக்களிடம் சொல்வதற்கு புரட்சிகரமான விஷயமோ, புதிய கதையோ, அறிவுரையோ என்னிடம் கிடையாது. எளிமையாக மக்களை சந்தோஷப்படுத்த நினைக்கக்கூடிய ஒரு கலைஞன். எனது படத்தை பார்க்க வரும் அனைவரையும் சந்தோஷப்படுத்தி அனுப்ப வேண்டும் என்பதுதான் என் நோக்கம். அப்படித்தான் இதுவரை என்னுடைய அனைத்து படங்களையும் செய்துள்ளேன். விமர்சனத்தில் நன்றாக திட்டுங்கள். அது எனக்கு பழகிவிட்டது. தயவுசெய்து முழுக்கதையையும் விமர்சனத்தில் சொல்லிவிடாதீர்கள்.என்னைப் போன்றவர்கள் கதையில் இரண்டு விஷயங்களை வைத்து அதற்கு ஒரு திரைக்கதையை அமைத்து படம் இயக்குவோம். விமர்சனத்தில் அந்த இரண்டு விஷயங்களையும் சொல்லிவிட்டால் புஸ் என்றாகிவிடும்’ என கூறியுள்ளார் .