மதுரையில் அரசு பஸ் கவிழ்ந்ததில் 8 பேர் படுகாயமடைந்து சிகிச்சைக்காக மருத்துவமனையில் சேர்க்கப்பட்டனர்.
மதுரை மாவட்டம் திருமங்கலத்திலிருந்து ஆரப்பாளையத்திற்கு தினமும் பயணிகளை ஏற்றிக்கொண்டு அரசு பஸ் ஒன்று செல்வது வழக்கம். அதேபோல் சம்பவத்தன்று அரசு பேருந்து திருமங்கலத்திலிருந்து ஆரப்பாளையத்திற்கு பயணிகளை ஏற்றிக் கொண்டு பழங்காநத்தம் அருகே சென்றது. அப்போது பேருந்து திடீரென டிரைவரின் கட்டுப்பாட்டை மீறி தாறுமாறாக ஓடியதில் அப்பகுதியிலிருந்த சாலையோர தடுப்பு சுவரின் மீது மோதியது.
இதனால் பேருந்து சாலையில் கவிழ்ந்ததில் டிரைவரோடு சேர்த்து 8 பேர் படுகாயமடைந்தனர். இது குறித்து தகவலறிந்து வந்த காவல்துறையினர் அவர்களை மீட்டு மதுரை அரசு மருத்துவமனைக்கு சிகிச்சைக்காக அனுப்பி வைத்துள்ளார்கள். மேலும் இது குறித்து காவல்துறையினர் வழக்குப்பதிவு செய்து விசாரணை நடத்தி வருகிறார்கள்.