திண்டுக்கல்லில் நள்ளிரவில் மாடுகளை திருட முயற்சித்த மர்ம நபர்களை காவல்துறையினர் வலைவீசி தேடி வருகின்றனர்.
திண்டுக்கல்லில் சட்டமன்ற தேர்தல் காரணமாக காவல்துறையினர் மற்றும் பறக்கும் படையினர் தீவிர சோதனை மேற்கொண்டு வருகின்றனர். மேலும் காவல்துறையினர் பலத்த பாதுகாப்பில் ஈடுபட்டு வருகின்றனர். இரவு நேரங்களில் காவல் துறையினர் தீவிரமாக ரோந்து பணியை மேற்கொண்டு வருகின்றனர். இந்நிலையில் சென்ற புதன்கிழமை அன்று நள்ளிரவில் திண்டுக்கல் மாநகராட்சி அலுவலகத்திற்கு அருகில் உள்ள மெயின் ரோட்டில் வடக்கு காவல்துறையினர் ரோந்து பணியில் ஈடுபட்டு வந்துள்ளனர்.
இந்நிலையில் அங்கு நான்கு மாடுகள் வெள்ளி விநாயகர் கோவில் அருகே சாலையின் நடுவில் நின்றுள்ளது. அப்போது அங்கு சரக்கு வாகனம் ஒன்றில் வேகமாக வந்த மர்ம நபர்கள் சாலையில் நின்று கொண்டிருந்த அந்த நான்கு மாடுளையும் திருடிச் செல்ல முயற்சித்துள்ளனர். ஆனால் மாடு பிடிபடாமல் ஓடியது. அதனை ரோந்து பணியில் ஈடுபட்டிருந்த காவல் துறையினர் பார்த்தனர்.
இதையடுத்து அந்த மர்ம நபர்களை பிடிப்பதற்காக வேகமாக ஓடியுள்ளனர். ஆனால் அவர்கள் மாடுகளை விட்டுவிட்டு காவல்துறையினரிடம் இருந்து தப்பி ஓடி விட்டனர். இந்த காட்சி அங்கு இருந்த கண்காணிப்பு கேமராவில் பதிவாகியுள்ளது. இது தற்போது சமூக வலைதளங்களில் வேகமாக பரவி வருகிறது. அந்த கேமராவில் பதிவான காட்சியை துருப்பு சீட்டாக கொண்டு அந்த மர்ம நபர்களை திண்டுக்கல் வடக்கு காவல் துறையினர் வலைவீசி தேடி வருகின்றனர்.