நயன்தாரா நடிப்பில் உருவாகி வரும் கனெக்ட் படத்தின் புரோமோ வீடியோ வெளியாகியுள்ளது.
தமிழ் திரையுலகில் முன்னணி நடிகையாக வலம் வருபவர் நயன்தாரா. தற்போது இவர் விக்னேஷ் சிவன் இயக்கத்தில் விஜய் சேதுபதி நடிப்பில் உருவாகி வரும் காத்துவாக்குல ரெண்டு காதல் படத்தில் கதாநாயகியாக நடித்துள்ளார். இந்த படத்தின் இறுதிகட்ட பணிகள் விறுவிறுப்பாக நடைபெற்று வருகிறது. இதுதவிர நயன்தாரா தெலுங்கில் காட்பாதர் என்ற படத்திலும், மலையாளத்தில் அல்போன்ஸ் புத்திரன் இயக்கத்தில் பிரித்விராஜ் நடிக்கும் கோல்ட் படத்திலும் நடித்து வருகிறார்.
மேலும் நேற்று நயன்தாராவின் பிறந்தநாளை முன்னிட்டு அவர் நடிக்கும் கனெக்ட் படத்தின் பர்ஸ்ட் லுக் போஸ்டர் வெளியானது. அஸ்வின் சரவணன் இயக்கும் இந்த படத்தில் அனுபம் கேர், சத்யராஜ் உள்ளிட்டோர் முக்கிய கதாபாத்திரங்களில் நடிக்கின்றனர். விக்னேஷ் சிவன்- நயன்தாராவின் ரவுடி பிக்சர்ஸ் நிறுவனம் இந்த படத்தை தயாரிக்கிறது. இந்நிலையில் கனெக்ட்- தி பர்ஸ்ட் கால் என்ற புரோமோ வீடியோவை படக்குழு வெளியிட்டுள்ளது. இந்த மிரட்டலான வீடியோ தற்போது இணையத்தில் வைரலாகி வருகிறது.