ஹாசன் மாவட்டம் சக்லேஷ்புரா தாலுகா சுக்ரவார சந்தை பகுதியில் மஞ்சுநாத் என்பவர் வசித்து வருகிறார். இவருக்கு அதே பகுதியில் தோட்டம் இருக்கிறது. இந்நிலையில் மஞ்சுநாத் தோட்டத்துக்கு சென்று வேலை செய்து கொண்டிருந்தார். அப்போது மஞ்சுநாத் தனது வளர்ப்பு நாயை உடன் அழைத்து சென்றுள்ளார். அந்த வளர்ப்பு நாய் அங்கும் இங்கும் சுற்றித்திரிந்து கொண்டிருந்தபோது தோட்டத்தில் நாகபாம்பு ஒன்று புகுந்துள்ளது. அந்த நாகப்பாம்பு மஞ்சுநாத் நோக்கி சென்றதாக தெரிகிறது. இதனை பார்த்த வளர்ப்பு நாய் தனது எஜமானை காப்பாற்ற நாகபாம்பை பார்த்து குரைத்து அதனை கடித்து குதறியது.
இதனிடையே நாகபாம்பும் நாயை கடித்து பதம் பார்த்தது. எனினும் நாய் நாகப்பாம்பை கடித்து கொன்று துண்டு, துண்டாக்கியது. இதையடுத்து பாம்பு இறந்த சில நிமிடங்களில் விஷம் ஏறி வளர்ப்பு நாயும் பரிதாபமாக இறந்து விட்டது. இவ்வாறு தனது உயிரை காப்பாற்ற வளர்ப்பு நாய் இறந்ததால் மஞ்சுநாத் கவலை அடைந்தார். இச்சம்பவத்தை மஞ்சுநாத் தனது செல்போனில் வீடியோ எடுத்து அதனை சமூக வலைதழங்களில் பதிவிட்டுள்ளார். இந்நிலையில் எஜமானரை காப்பாற்ற நாகப்பாம்புடன் சண்டையிட்டு அதை கொன்று, தனது உயிரைவிட்ட வளர்ப்பு நாய் குறித்த வீடியோ காட்சிகள் சமூக வலைதளங்களில் வைரலாகி பரபரப்பை ஏற்படுத்தி வருகிறது.