இந்தியா முழுவதிலும் கொரோனா பாதிப்பு நாளுக்கு நாள் அதிகரித்துக் கொண்டே வருவதால், அதனை கட்டுப்படுத்த நாடு முழுவதும் தடுப்பூசி போடும் பணி தீவிரப்படுத்தப்பட்டுள்ளது. அதற்கான தடுப்பூசிகளை மாநில அரசுகளுக்கு மத்திய அரசு வழங்கி வருகிறது. அதில் முதற்கட்டமாக சுகாதாரத்துறை ஊழியர்கள் மற்றும் முன் களப் பணியாளர்களுக்கு கடந்த ஜனவரி மாதம் தடுப்பூசி போடும் பணி தொடங்கியது. அதன் பிறகு 45 வயதிற்கு மேற்பட்டோருக்கு தடுப்பூசி போடப்பட்டது. தற்போது பெரும்பாலான மாநிலங்களில் 18 வயது முதல் 44 வயதுடையோருக்கு தடுப்பூசி போடும் பணி தொடங்கியுள்ளது.
இந்நிலையில் பெரும்பாலான மாநிலங்களில் தடுப்பூசி போடுவது கட்டாயமாக்கப்பட்டுள்ள நிலையில், தடுப்பூசி செலுத்திய பணியாளர்களுக்கும் மட்டும் ஜூன் மாத ஊதியம் வழங்கப்படும் என திருப்பதி தேவஸ்தானம் அறிவித்துள்ளது. அதன்படி ஜூலை 7-ஆம் தேதிக்குள் தடுப்பூசி போட்டால் மட்டுமே மாத ஊதியம் வழங்கப்படும். திருப்பதி தேவஸ்தானத்தில் பணியாற்றும் 14 ஆயிரம் ஊழியர்களுக்கு தடுப்பூசி போட நிர்வாகம் நடவடிக்கை மேற்கொண்டுள்ளது. தடுப்பூசி போடாமல் அலட்சியமாக இருந்தால் அதிரடி நடவடிக்கை எடுக்கப்படும் என்றும் தெரிவித்துள்ளது.