பேரூராட்சித் தலைவர்கள் மற்றும் துணைத்தலைவர்களுக்கான நிர்வாக பயிற்சி நிறைவு விழாவானது சென்னை கலைவாணர் அரங்கத்தில் நேற்று நடைபெற்றது. இதனை முன்னிட்டு கழிவுகளில் இருந்து தயாரிக்கப்பட்ட கலை பொருட்கள் கண்காட்சி அமைக்கப்பட்டிருந்து. இதை முதல்வர் மு.க.ஸ்டாலின் பார்வையிட்டார். பேரூராட்சி தலைவர்கள் மற்றும் துணைத்தலைவர்களுக்கான நிர்வாக பயிற்சி நிறைவு விழாவில் ஸ்டாலின் பேசியதாவது “பேரூராட்சியினுடைய பொது நிதியிலிருந்து நிர்வாக அனுமதி வழங்குவதற்கான உச்சவரம்பை உயர்த்த வேண்டும் என்று கோரிக்கை வைத்தார்கள்.
இதனால் பணிகளை விரைவாக செயல்படுத்திடும் அடிப்படையில் உச்சவரம்பு, 2-ம் நிலை மற்றும் முதல் நிலை பேரூராட்சிகளுக்கு ரூபாய் 4 லட்சத்திலிருந்து ரூ.10 லட்சம் ஆகவும், தேர்வு நிலை மற்றும் சிறப்பு நிலை பேரூராட்சிகளுக்கு ரூபாய் 8 லட்சத்திலிருந்து ரூ.15 லட்சம் ஆகவும், உதவி இயக்குனர் அளவிலே ரூ.20 லட்சத்திலிருந்து ரூ.30 லட்சம் ஆகவும், மாவட்ட கலெக்டருக்கு ரூ.30 லட்சத்திலிருந்து ரூ.50 லட்சம் ஆகவும் உயர்த்தப்படும் என்பதை மகிழ்ச்சியோடு தெரிவித்துக்கொள்ள விரும்புகிறேன்” என்று அவர் தெரிவித்தார்.