மருத்துவமனையில் இருந்து தப்பியோடிய கைதியை போலீசார் மீண்டும் கைது செய்து சிறையில் அடைத்துள்ளனர்.
தேனி மாவட்டம் பெரியகுளத்தை அடுத்துள்ள கைலாசபட்டியில் நாராயணன் (27) என்பவர் வசித்து வந்துள்ளார். சென்ற வாரம் காவல்துறையினர் இவரை கொலை முயற்சி வழக்கில் கைது செய்து பெரியகுளம் கிளை சிறையில் அடைத்துள்ளனர். இந்நிலையில் கடந்த 10-ம் தேதி நாராயணனுக்கு திடீரென உடல்நிலை பாதிக்கப்பட்டுள்ளது. இதனால் காவல்துறையினர் அவரை பெரியகுளம் அரசு மருத்துவமனையில் சிகிச்சைக்காக அனுமதித்துள்ளனர்.
இதனையடுத்து மருத்துவமனையில் இருந்த நாராயணன் காவல்துறையினருக்கும், மருத்துவர்களுக்கும் தெரியாமல் அங்கிருந்து தப்பி ஓடியுள்ளார். இதுகுறித்து தென்கரை காவல்துறையினர் வழக்குப்பதிவு செய்து நாராயணனை வலைவீசி தேடி வந்துள்ளனர். இந்நிலையில் அவர் தென்கரை பகுதில் உள்ள வராகநதி அருகே பதுங்கி இருப்பது தெரியவந்த நிலையில் சம்பவ இடத்திற்கு விரைந்து சென்ற காவல்துறையினர் அப்பகுதியில் பதுங்கியிருந்த நாராயணனை கைது செய்து மீண்டும் சிறையில் அடைத்துள்ளனர்.