ஜனாதிபதி திரௌபதி முர்மு, பக்கிங்ஹாம் அரண்மனையில் இங்கிலாந்து மன்னர் 3-ம் சார்லசை சந்தித்துள்ளார்.
இங்கிலாந்து நாட்டின் மகாராணி 2-ம் எலிசபெத் கடந்த 8-ஆம் தேதி உயிரிழந்துள்ளார். அவர் தனது 96-வது வயதில் ஸ்காட்லாந்தில் உள்ள பால்மோரல் பண்ணை மாளிகையில் உடல்நலக்குறைவு காரணமாக உயிரிழந்துள்ளார். அவரது மறைவுக்கு பிரதமர் மோடி உள்ளிட்ட உலக நாடுகளின் தலைவர்கள் பலர் இரங்கல் தெரிவித்துள்ளனர். ஸ்காட்லாந்திலிருந்து விமானம் மூலம் 2-ம் எலிசபெத்தின் உடல் கடந்த 13-ஆம் தேதி இங்கிலாந்து சென்றடைந்தது. லண்டனில் மகாராணி எலிசபெத்தின் உடலை இங்கிலாந்து மன்னர் சார்லசும், ராணி கமிலாவும் பெற்றுக்கொண்டுள்ளனர்.
விமான நிலையத்திலிருந்து கார் மூலம் 2-ம் எலிசபெத்தின் உடல் பக்கிங்ஹாம் அரண்மனைக்கு கொண்டு செல்லப்பட்டது. மகாராணி எலிசபெத்தின் இறுதிச்சடங்கு இன்று நடைபெற உள்ளது. இதற்கிடையே, மகாராணி 2-ம் எலிசபெத்தின் இறுதிச்சடங்கு நிகழ்ச்சியில் பங்கேற்பதற்காக உலக நாடுகளின் தலைவர்கள் இங்கிலாந்திற்கு விரைந்த வண்ணம் உள்ளனர். மகாராணி 2-ம் எலிசபெத்தின் உடல் லண்டனில் உள்ள வெஸ்ட் மின்ஸ்டர் மண்டபத்தில் மேடையில் அஞ்சலிக்காக வைக்கப்பட்டுள்ளது. அவரது உடலுக்கு தொடர்ந்து 24 மணி நேரமும் மக்கள் நீண்ட வரிசையில் நின்று அஞ்சலி செலுத்தி வருகின்றனர். இங்கிலாந்து மகாராணி 2-ம் எலிசபெத்தின் இறுதிச்சடங்கில் பங்கேற்பதற்காக அரசு முறை பயணமாக இந்திய ஜனாதிபதி திரவுபதி முர்மு நேற்று முன்தினம் இங்கிலாந்து சென்றடைந்தார்.
அவர் நேற்று வெஸ்ட் மின்ஸ்டர் மண்டபத்தில் வைக்கப்பட்டுள்ள 2-ம் எலிசபெத்தின் உடலுக்கு இந்தியா சார்பில் அஞ்சலி செலுத்தினார். இன்று நடைபெற உள்ள 2-ம் எலிசபெத்தின் இறுதிச்சடங்கு நிகழ்ச்சியிலும் திரவுபதி முர்மு பங்கேற்கயுள்ளார். இதனை தொடர்ந்து மகாராணி 2-ம் எலிசபெத்தின் உடலுக்கு அஞ்சலி செலுத்திய ஜனாதிபதி திரவுபதி முர்மு, லண்டனிலுள்ள லான்காஸ்டர் மாளிகையில் ராணி 2-ம் எலிசபெத்துக்கான இரங்கல் புத்தகத்தில் கையெழுத்திட்டார். இதுகுறித்து ராஷ்டிரபதி பவன் வெளியிட்டுள்ள டுவிட்டர் பதிவில் கூறியதாவது, “ஜனாதிபதி திரவுபதி முர்மு லண்டனிலுள்ள லான்காஸ்டர் மாளிகையில் ராணி 2-ம் எலிசபெத்தின் நினைவாக இரங்கல் புத்தகத்தில் கையெழுத்திட்டார்” என்று அவர் பதிவிட்டுள்ளார். இந்நிலையில், மகாராணி எலிசபெத்தின் இறுதிச் சடங்கிற்கு முன்னதாக, நேற்று பக்கிங்ஹாம் அரண்மனையில் வரவேற்பு நிகழ்ச்சி நடைபெற்றது. இந்நிகழ்ச்சியில் இங்கிலாந்து மன்னர் 3-ஆம் சார்லசை, ஜனாதிபதி திரவுபதி முர்மு சந்தித்தார்.