தமிழக அரசுக்கு சென்னை ஐகோர்ட்டு பக்கிங்ஹாம் கால்வாயை முழுமையாக மீட்டெடுக்க வேண்டும் என்று அறிவுறுத்தி உள்ளது.
ஆங்கிலேயர் ஆட்சி காலத்தில் ஆந்திராவில் இருந்து புதுச்சேரி வரை அமைக்கப்பட்ட பக்கிங்ஹாம் கால்வாயில் உள்ள ஆக்கிரமிப்புகளை அகற்றக் கோரி கடந்த 2014 ஆம் ஆண்டு சென்னை ஐகோர்ட்டில் வழக்கு ஒன்று தொடரப்பட்டது. மேலும் இந்த வழக்கு பல ஆண்டுகளாக நிலுவையில் இருந்தது. இந்நிலையில், இந்த வழக்கானாது தலைமை நீதிபதி முனீஷ்வர்நாத் பண்டாரி தலைமையிலான அமர்வில் நேற்று மீண்டும் விசாரணைக்கு வந்துள்ளது.
அப்போது கால்வாய்க்கு உள்ளும், கரையிலும் உள்ள ஆக்கிரமிப்புகளை அகற்ற வேண்டும்.மேலும் ஆக்கிரமித்தவர்களுக்கு மறுவாழ்வு திட்டங்களை வகுக்க வேண்டும் என்றும் நீதிமன்றத்துக்கு உதவியாக நியமிக்கப்பட்ட வழக்கறிஞர் ரகுநாதன் தெரிவித்துள்ளார்.
இதையடுத்து இவ்வழக்கு கருத்து தெரிவித்த தலைமை நீதிபதி, ஆந்திராவில் இருந்து புதுச்சேரி வரை உள்நாட்டு நீர்வழித்தடமாக இருந்த பக்கிங்ஹாம் கால்வாய் ஆக்கிரமிப்புகளால் முழுவதுமாக மோசமடைந்துள்ளதாகவும் மற்றும் ஆக்கிரமிப்புகளை முழுமையாக அகற்றி, அதனை பழையபடி மீட்டெடுக்க வேண்டும் என தெரிவித்துள்ளார். மேலும் பேசிய அவர், ஆக்கிரமிப்பாளர்களுக்கு மறுவாழ்வு வழங்குவது என்பது, ஆக்கிரமிப்பை ஊக்குவிப்பது போன்றது. எனவே பக்கிங்ஹாம் கால்வாயை அழகுபடுத்தும் போது, நகரமும் அழகாகும் எனவும் அதை தொடர்ந்து பராமரிப்பதில் மக்களுக்கும் பங்கு உள்ளது என நீதிபதி கூறியுள்ளார்.
இந்நிலையில் நீர்நிலை ஆக்கிரமிப்புகள் தொடர்பான வழக்குகள் இன்று விசாரணைக்கு வர உள்ளதால், இந்த வழக்கையும், அவற்றுடன் சேர்த்து விசாரிக்க வேண்டும் என்ற அரசுத்தரப்பு கோரிக்கையை ஏற்று, விசாரணையை நீதிபதிகள், இன்று ஒத்தி வைத்தனர்.