பக்தர் ஒருவர் திருப்பதி தேவஸ்தானத்திடம் தொலைபேசி வாயிலாக, பேசும்போது, திருப்பதியில் பக்தர்களுக்கு தேவையான வசதிகள் எல்லாம் மிக நன்றாக இருக்கின்றன. ஆனால், லட்டு பிரசாதத்தில் மட்டும் இனிப்பு சற்று அதிகமாக உள்ளது. லட்டு பிரசாதத்தை என் போன்ற சர்க்கரை நோயாளிகள் உண்ண முடியாது. ஆதலால், சர்க்கரை நோயாளிகள் கூட லட்டு பிரசாதத்தை சாப்பிடும் பாக்கியத்தை தேவஸ்தானம் ஏற்படுத்தி கொடுத்தால் நன்றாக இருக்கும் என்று வேண்டுகோள் விடுத்ததாகவும்,அதற்கு அதிகாரி தர்மா ரெட்டி பதிலளிக்கையில், சர்க்கரை நோயாளிகளுக்கென தனியாக லட்டு தயாரித்து வழங்க ஆலோசித்து முடிவு எடுக்கப்படும் என்று கூறியதாகவும் தகவல் வெளியானது.
இந்நிலையில் திருப்பதியில் நோயாளிகளுக்கு இனிப்பு குறைவான லட்டு வழங்கப்பட உள்ளதாக வெளியான தகவலுக்கு தேவஸ்தானம் விளக்கம் அளித்துள்ளது. அதாவது திருப்பதிக்கு வரும் சர்க்கரை நோய் உள்ள பக்தர்களுக்கு இனிப்பு குறைவான லட்டுகள் உற்பத்தி செய்யப்படுவதாக தகவல் வெளியானது. இதற்கு விளக்கமளித்த தேவஸ்தானம், இந்த தகவல் பொய்யானது. திருப்பதியில் வழங்கப்படும் லட்டு பிரசாதம் ஆண்டாண்டாக எப்படி செய்யப்படுகிறதோ அதே முறையில் தொடர்ந்து செய்யப்படும் என்று தெரிவித்துள்ளது.