திருநெல்வேலி மாவட்ட ஆட்சியர் விஷ்ணு பசுமை சாம்பியன் விருதுக்கு தகுதியானவர்கள் விண்ணப்பிக்கலாம் என செய்திக்குறிப்பில் தெரிவித்துள்ளார்.
திருநெல்வேலி மாவட்ட ஆட்சியர் விஷ்ணு வெளியிட்டுள்ள செய்திக்குறிப்பில் கூறியிருப்பதாவது, தமிழக அரசின் சுற்றுச்சூழல் பாதுகாப்பு மற்றும் விழிப்புணர்வு ஏற்படுத்தும் பொருட்டு தங்களை முழுமையாக அர்ப்பணித்த 100 நபர்களுக்கு பசுமை சாம்பியன் விருது வழங்கி தலா 1 லட்ச ரூபாய் வழங்கப்பட உள்ளது. சுற்றுச்சூழல் கல்வி மற்றும் பயிற்சி, சுற்றுச்சூழல் பாதுகாப்பு, பசுமை தொழில்நுட்பம் தொடர்பான விஞ்ஞான ஆய்வுகள், காலநிலை மாற்றத்திற்கு உட்படுதல் மற்றும் தடுப்பு நடவடிக்கை, பிளாஸ்டிக் கழிவுகளை மறுசுழற்சி மற்றும் கட்டுப்பாடு நடவடிக்கை, கடற்கரை பாதுகாப்பு நடவடிக்கை, சுற்றுசூழல் மறுசீரமைப்பு மற்றும் பாதுகாப்பு ஆகியவற்றை தங்கள் மாவட்டத்தில் செயல்படுத்திய கல்விநிறுவனங்கள், குடியிருப்போர் நல சங்கங்கள், தனிநபர்கள், தொழிற்சாலை மற்றும் உள்ளாட்சி அமைப்புகளுக்கு பசுமை சாம்பியன் விருது வழங்கப்படும்.
இந்நிலையில் தமிழ்நாடு மாசு கட்டுப்பாட்டு வாரியம் மற்றும் மாவட்ட ஆட்சியரின் தலைமையில் அமைக்கப்பட்ட பசுமை சாம்பியன் விருது தேர்வு செய்யும் குழு தகுதியுடைய 100 நபர்கள் மற்றும் நிறுவனங்களை தேர்வு செய்வர். இதற்கான விண்ணப்பத்தை தமிழ்நாடு மாசுக்கட்டுப்பாடு வாரிய www.tnpcb.gov.in என்ற இணையதளத்தில் இருந்து பதிவிறக்கம் செய்துகொள்ளலாம். இதை தவிர கூடுதல் தகவல்கள் தேவை என்றால் தமிழ்நாடு மாசு கட்டுப்பாட்டு வாரிய நெல்லை மாவட்ட சுற்றுச்சூழல் பொறியாளரை அணுகலாம். இந்த விருதுக்கு விண்ணப்பிக்க வருகிற 15-ஆம் தேதி செவ்வாய்க்கிழமை கடைசி நாளாகும் என அதில் கூறப்பட்டுள்ளது.