பட்ட பகலில் வீடு கதவை உடைத்து 6 பவுன் தங்க நகையை திருடி சென்ற மர்ம நபர்களை போலீசார் வலைவீசி தேடி வருகின்றனர்.
நாமக்கல் மாவட்டம் கரையாம்புதூர் பகுதியில் சக்திவேல் (35) என்பவர் வசித்து வருகிறார். மெக்கானிக்கான இவர் சம்பவத்தன்று தனது மனைவி காந்திமதியுடன் (32) வீட்டை பூட்டிவிட்டு உறவினர் வீட்டிற்கு சென்றுள்ளார். இதனையடுத்து மீண்டும் வீடு திரும்பிய போது வீட்டு கதவின் பூட்டு உடைக்கப்பட்டு இருந்தது. இதனை பார்த்து அதிர்ச்சி அடைந்த சக்திவேல் வீட்டிற்குள் சென்று பார்த்த போது பொருட்கள் சிதறிய நிலையில் பீரோ உடைக்கப்பட்டு அதில் இருந்த 6 சவரன் தங்கநகைகள் திருடு போயிருந்தது.
இதுகுறித்து அவர் உடனடியாக நல்லிபாளையம் காவல் நிலையத்தில் புகார் அளித்துள்ளார். அந்த புகாரின் அடிப்படையில் காவல்துறையினர் வழக்குப்பதிவு செய்து விசாரணை நடத்தினர். இதனைதொடர்ந்து முதற்கட்ட விசாரணையில் இச்சம்பவம் திட்டமிட்டு நடந்த திருட்டு என்பது தெரியவந்துள்ளது. மேலும் அந்த மர்ம நபர்களை காவல்துறையினர் வலைவீசி தேடி வருகின்றனர். இச்சம்பவம் அப்பகுதியில் பரபரப்பை ஏற்படுத்தியுள்ளது.