இருசக்கர வாகனம் நேருக்கு நேர் மோதியதில் பெண்கள் உள்பட 3 பேர் காயமடைந்த நிலையில் 2 வாலிபர்கள் உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
ராமநாதபுரம் மாவட்டம் மண்டபத்தில் உள்ள அகதிகள் முகாமில் சதீஷ்குமார் (29) என்பவர் வசித்து வந்துள்ளார். மீனவரான இவர் தனது சகோதரர் தனபாலன்(25) மற்றும் பெரியம்மா பஞ்சவர்ணம்(35) ஆகிய மூவரும் இருசக்கர வாகனத்தில் மேலமடை பகுதியில் உள்ள உறவினரின் திருமண நிகழ்ச்சிக்கு சென்று விட்டு மீண்டும் வீட்டிற்கு திரும்பி உள்ளனர். இருசக்கர வாகனத்தை சதீஷ்குமார் ஓட்டி வந்துள்ளார். இந்நிலையில் எதிரே நாரையூரணி பகுதியை சேர்ந்த தனசீலன் (18) என்பவர் தனது பெரியம்மா ஆனந்தியுடன் (50) கோவிலுக்கு சென்றுவிட்டு மீண்டும் ஊருக்கு திரும்பிக் கொண்டிருந்துள்ளனர்.
இதனையடுத்து தாமரைக்குளம் அம்மாபட்டினம் அருகே சென்று கொண்டிருந்தபோது 2 இருசக்கர வாகனங்களும் நேருக்கு நேர் பயங்கரமாக மோதி கொண்டுள்ளது. இந்த கோர விபத்தில் இருசக்கர வாகனத்தை ஓட்டி வந்த சதீஷ்குமார் மற்றும் தனசீலன், தனபாலன், பஞ்சவர்ணம், ஆனந்தி ஆகியோர் பலத்த காயமடைந்துள்ளனர். இதனை பார்த்த அக்கம்பக்கத்தினர் உடனடியாக 5 பேரையும் மீட்டு ராமநாதபுரம் அரசு மருத்துவமனைக்கு அனுப்பி வைத்துள்ளனர். ஆனால் அங்கு சிகிச்சை பலனின்றி சதீஷ்குமார் மற்றும் தனசீலன் ஆகிய இருவரும் பரிதாபமாக உயிரிழந்துள்ளனர். தற்போது மற்ற 3 பேருக்கு தீவிர சிகிச்சை அளிக்கப்பட்டு வருகிறது. மேலும் விபத்து குறித்து காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.