லாரி மீது மினிலாரி மோதிய விபத்தில் மீன் வியாபாரி பலியான நிலையில் 3 பேர் படுகாயமடைந்த சம்பவம் பரபரப்பை ஏற்படுத்தியுள்ளது.
தஞ்சாவூர் மாவட்டத்திலுள்ள கீழவாசல் பகுதியில் முகமது என்பவர் வசித்து வருகிறார். இவருக்கு மீன் வியாபாரியான ஷேக்தாவூத் என்ற மகன் இருந்துள்ளார். இந்நிலையில் ஷேக்தாவூத் மீன்களை மினி லாரியில் ஏற்றிக்கொண்டு திருவண்ணாமலையில் இருந்து தஞ்சாவூர் நோக்கி சென்று கொண்டிருந்தார். இந்த மினி லாரியை தங்கபாண்டி என்பவர் ஓட்டிச் சென்றுள்ளார். இவர்களுடன் கமலநாதன், ரசூல் ஆகியோரும் இருந்தனர். இந்நிலையில் அரியலூர் மாவட்டத்தில் உள்ள கீழப்பழுவூர் அருகே சென்று கொண்டிருந்த போது கட்டுப்பாட்டை இழந்த மினி லாரி சாலையோரம் நின்று கொண்டிருந்த லாரி மீது பயங்கரமாக மோதியது.
இந்த விபத்தில் படுகாயமடைந்த ஷேக்தாவூத் சம்பவ இடத்திலேயே பரிதாபமாக இறந்துவிட்டார். இதனையடுத்து படுகாயமடைந்த 3 பேரையும் அருகில் உள்ளவர்கள் மீட்டு மருத்துவமனைக்கு சிகிச்சைக்காக அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இதுகுறித்து வழக்குப்பதிவு செய்த காவல்துறையினர் விசாரணை நடத்தி வருகின்றனர்.