மோட்டார் சைக்கிள் மீது லாரி மோதிய விபத்தில் கணவர் கண்முன்னே இளம்பெண் உயிரிழந்த சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள சோழவரம் புதூர் பெருமாள் கோவில் தெருவில் விவசாயக் கூலி தொழிலாளியான குமார் என்பவர் வசித்து வருகிறார். இவருக்கு சுதா என்ற மனைவி இருந்துள்ளார். இந்நிலையில் தம்பதியினர் இருவரும் மோட்டார் சைக்கிளில் சென்னையில் இருக்கும் கண் மருத்துவமனைக்கு வந்து விட்டு மீண்டும் வீட்டிற்கு சென்றுள்ளனர். இவர்கள் பாடியநல்லூர் சிக்னல் அருகே சென்று கொண்டிருந்தபோது சோழவரம் நோக்கி வேகமாக சென்ற லாரி மோட்டார் சைக்கிள் மீது பயங்கரமாக மோதியது. இந்த விபத்தில் படுகாயமடைந்த சுதா குமாரின் கண்முன்னே சம்பவ இடத்திலேயே பரிதாபமாக இறந்துவிட்டார்.
இதுகுறித்து தகவலறிந்த மாதவரம் போக்குவரத்து புலனாய்வு பிரிவு காவல்துறையினர் சம்பவ இடத்திற்கு விரைந்து சென்று சுதாவின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் லாரி ஓட்டுநரான சீனிவாசன் என்பவரை கைது செய்து விசாரணை மேற்கொண்டு வருகின்றனர்.